په انګور اډه کې پرلت کونکي وايي د واڼه پولیس هڅه کوي چې د دغه پرلت مشران او فعال کسان ونیسي او په دې سره دغه پرلت ړنګ کړي. نن څوارلسمه ورځ ده چې د سوېلي وزیرستان په انګور اډه کې د برمل او انګور اډې په دروازه د پاسپورټ او ویزې د جبري کېدو په غبرګون کې د سیمې خلکو پرلت وهلی.
ټیک درې ورځې وړاندې د سوېلي وزیرستان واڼه پولیسو د دوشنبې په ورځ (لیندۍ ۶مه) په انګور اډه کې د روان پرلت یو مشر مولوي فضل نیولی او له ځان سره یې وړی دی.
پولیسو هغه مهال پرلت کونکو ته ویلي و چې مولوي فضل يې په حکومت پسې د خبرو په تور نیولی.
مولوي فضل په خپلو خبرو کې د پاکستان پر حکومت نیوکې کړې وې.
د دغه پرلت ګډونوال چې نن د (لیندۍ ۹مه) يې ۱۴مه ورځ ده وايي، د کومو غوښتنو په موخه يې چې پرلت وهلی له هغو نه په شا کیږي او دا پرلت به روان ساتي.
د پاکستان حکومت د سپین بولدک ـ چمن په دروازه د تګ راتګ پرمهال د پاسپورټ او ویزې تر جبري کيدو وروسته د انګور اډې ـ او برمل تر منځ په تګ راتګ پاسپورټ او ویزې جبري کړل چې په سیمه کې يې خلکو په غبرګون کې پرلت وهلی.
تر اوسه پورې د پاکستان حکومت د دغو پرلت کونکو غوښتنو ته مثبت ځواب نه دی ويلی.
پرلت وال وايي ځايي حکومتي مسولان هڅه کوي د پرلت مشرانو په نیولو هغوی وډاروي او په دې سره پرلت ړنګ کړي.
د انګور اډې يو ځايي مشر حاجي صحبت خان افغانستان انټرنشنل پښتو ته وويل، حکومتي چارواکي ايله وخت تېروي او یوازې د خبرو اترو په نوم ځي او راځي: «حکومتي کسان کوشش کوي چې پرلت ړنګ کړي، زموږ غوښتنو ته غوږ نه ږدي، د پرلت مشر مولوي فضل يې ونیو او بندي کړی يې دی اوس کوشش کوي نور مشران هم ونیسي.»
په سیمه کې سرچينې وايي چې دغلته واړه بازارونه او ټولې لویې او وړې لارې تړل شوې دي او خلک د خوراکي او اړتيا وړ توکو له کمښت سره مخ شوي.
د ګل ولي محسود په نوم د پرلت یو ګډونوال افغانستان انټرنشنل پښتو ته وايي: «ټولې لارې بندي دي، بازارونه بند دي، حکومت هیڅ ځان نه پوهوي راباندې، خو په حکومت مو هم لارې بندې دي، حکومتي چارواکي او امنیتي کسان هم تګ راتګ پرې نه شي کولای او هغه لارې چې حکومتي ودانیو او امنیتي پوستو ته تللې دي هغه مو هم پرې بندې کړې دي.»
د انګور اډې اوسېدونکو د دغه پرلت په دویمه ورځ د پاکستان له حکومته څوارلس غوښتنې کړې وې چې په څوارلسو غوښتنو کې په پاسپورت د تګ راتګ نه منل، د پوځ له خوا د افغانانو نه ځورول، د مالونو ازاد وړل راوړل، پر مالونو د مالیې کمښت، د دولتي ښوونځیو پرانیستل کیدل، په ځڼغوزیو د مالیې نه وضعه کیدل، د خمرانګ دروازې له منځه وړل، د حکومت له زندانونو د سیمې د ځوانانو خوشې کېدل، د لارې د امنیت ټینګول، د روغتیايي اسانتیاو او دې ته ورته نورې غوښتنې شاملې وې.
پاکستاني حکومت تر اوسه پورې په دې اړه خپل دريځ نه دی روښانه کړی او یوازې په دې کلک ولاړ دی چې افغانستان ته په ټولو لارو به تګ راتګ په افغاني او پاکستاني پاسپورټونو او وېزو کیږي.
دغې ادارې په خپله اېکس پاڼه نن پنجشنبې (د لیندۍ ۹مه) د یوه راپور په خپرولو سره زیاته کړې ده، د هرات له زلزلې څخه ژوندي پاتې شوي کسان، چې ډیری یې ښځې او ماشومان دي، په خیمو کې ژوند کوي او له سخت ژمي سره مخامخ دي.
د خبرپاڼې له مخې، دغه زیانمن هراتیان اوبو، روغتیایي پاملرنې، خوړو او مناسبې سرپناه ته اړتیا لري.
د ملګرو ملتونو دغې پراختیایي ادارې له راپور سره یوه ویډیو هم خپره کړې چې د نفیسې په نامه د هرات د زلزلو یوه زیانمنه میرمن د زلزلې د اوښتو زیانونو او د خپل ژوند د وضعیت په اړه په کې خبرې کوي.
میرمن نفیسه چې د خپل ویجاړ کور تر مخ ولاړه ده وایي، په دې ساړه ژمي کې له خپلو ماشومانو سره په ډیرې ویرې او اندیښنې سره د خیمو ترلاندې ژوند کوي.
د هغې په خبره: «تېره شپه سخت توپان و او مونږ فکر کاوه، چې دغه توپان به مو ماشومان او خیمې یوسي، ماشومان مې سخت ویریدلي و او دا دردونکی حالت دی.»
نوموړې همداراز زیاته کړه چې، دوی اوسمهال خوړو او مناسبې سرپناه ته اړتیا لري.
یو این ډيپي د ۲۵ میلیون ډالرو اضافي مرستې په غوښتنې سره غواړي چې د اغیزمنو کسانو لومړنۍ اړتیاوې پوره کړي او دغه اداره د دې پلان موخه د سرپناه چمتو کول بولي.
دا په داسې حال کې ده چې په هرات ولایت کې د تلې په ۱۵مه د خونړۍ زلزلې له امله د دغه ولايت زرګونو اوسېدونکو ته ډېر مالي او ځاني زيانونه ورسیدل.
له زلزلې وروسته ګڼ کورونه ويجاړ شوي او ډیری زیانمنې کورنۍ اوسمهال د ژمي په سړه هوا کې تر خيمو لاندې ژوند کوي.
سره له دې چې د ايران، چين، ترکيې او یو شمیر نورو هېوادونو او نړیواله مرستندویه ادارو له خوا د هرات ولایت له زیانمنو کسانو سره مرستې شوي، خو د دغه ولايت اوسېدونکي لا هم د خپل ژوند له ناوړه شرايطو شکايت کوي.
