اصف زرداري: بلاول بوټو زرداري به د پاکستان تر ټولو ځوان لومړی وزیر وي

AP ۱۴۰۲ لیندۍ ۹

د پاکستان پخوانی لومړی وزیر اصف علي زرداری وايي، د نوموړي زوی او پخوانی د بهرنیو چارو وزیر بلاول بوټو زرداري به د دغه هېواد تر ټولو ځوان لومړی وزیر وي.

اصف علي زرداري نن د بلوچستان په مرکز کوېټه کې د پاکستان پیپلز ګوند د ۵۶ کلیزې په ویاړ جوړه شوې غونډه کې دا خبره وکړه.

د جیو نیوز د راپور له مخې؛ هغه د پنجشنبې په ورځ په خپله وینا کې د پاکستان او بلوچستان د پرمختګ په هکله ویل چې بلاول بوټو به د ځوانانو او راتلونکي مشر وي او ملاتړ یې پکار دی.

د اصف علي زرداري په خبره؛ بلاول او اصفه به د پیپلز ګوند له مینوالو سره له پاکستان څخه ستر هېواد جوړ کړي.

د هغه په خبره؛ خلک اوس هم بلاول په دې پېژني چې هغه به د پاکستان تر ټولو کم عمره لومړی وزیر جوړ شي.

د پاکستان راتلونکې ټولټاکنې د راتلونکې فیبرورۍ پر اتمه نېټه کېږي.

د عمران خان په مشرۍ تحریک انصاف ګوند چې مشران یې له مختلفو دوسیو سره مخ دي، د دې سیالۍ ډګر یې تر ډېره پیپلز او مسلم لیګ نواز ګوندونو ته پرېښودلی دی.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ