په پروان کې د طالبانو والي عبدالعلي قدرت الله امیني اعلان وکړ، چې د سالنګ لویه لار به په دوو اونیو کې د موټرو د تګ راتګ پر مخ خلاصه شي. طالبانو د وږي په ۱۹مه د سالنګ لویه لار د "بیارغونې" په موخه د ټرافیکو پر مخ وتړله.
د طالبانو تر کنټرول لاندې د باختر خبري اژانس د چهارشنبې په ورځ د (لېندۍ ۸مه) خبر ورکړ، چې د پروان ولايت د دغې ډلې والي ویلي چې د بيارغونې چارې به په دوو اوونيو کې بشپړې شي.
د طالبانو د ټولګټو وزارت ویاند د یکشنبې په ورځ (د وږي په ۱۹مه) اعلان وکړ، چې د سالنګ لویه لار د ټولو موټرو پر مخ تړلې ده.
محمد اشرف حق شناس د سالنګ د لویې لارې د تړل کېدو لامل د هغې بیا رغونه یاده کړه او له چلوونکو یې وغوښتل، چې له بدیلو لارو کار واخلي.
له هغه وروسته افغانستان انټرنشنل ته داسې ویډیوګانې رسېدلې وې، چې په سالنګ تونل کې ګڼ شمېر مسافر بند پاتې دي.
د افغانستان انټرنشنل لېدونکي وايي، د سالنګ تونل دواړو غاړو ته په زرګونو موټر د د لویې لارې د بیا پرانیستلو په تمه ولاړ دي.
دغې ادارې په خپله اېکس پاڼه نن پنجشنبې (د لیندۍ ۹مه) د یوه راپور په خپرولو سره زیاته کړې ده، د هرات له زلزلې څخه ژوندي پاتې شوي کسان، چې ډیری یې ښځې او ماشومان دي، په خیمو کې ژوند کوي او له سخت ژمي سره مخامخ دي.
د خبرپاڼې له مخې، دغه زیانمن هراتیان اوبو، روغتیایي پاملرنې، خوړو او مناسبې سرپناه ته اړتیا لري.
د ملګرو ملتونو دغې پراختیایي ادارې له راپور سره یوه ویډیو هم خپره کړې چې د نفیسې په نامه د هرات د زلزلو یوه زیانمنه میرمن د زلزلې د اوښتو زیانونو او د خپل ژوند د وضعیت په اړه په کې خبرې کوي.
میرمن نفیسه چې د خپل ویجاړ کور تر مخ ولاړه ده وایي، په دې ساړه ژمي کې له خپلو ماشومانو سره په ډیرې ویرې او اندیښنې سره د خیمو ترلاندې ژوند کوي.
د هغې په خبره: «تېره شپه سخت توپان و او مونږ فکر کاوه، چې دغه توپان به مو ماشومان او خیمې یوسي، ماشومان مې سخت ویریدلي و او دا دردونکی حالت دی.»
نوموړې همداراز زیاته کړه چې، دوی اوسمهال خوړو او مناسبې سرپناه ته اړتیا لري.
یو این ډيپي د ۲۵ میلیون ډالرو اضافي مرستې په غوښتنې سره غواړي چې د اغیزمنو کسانو لومړنۍ اړتیاوې پوره کړي او دغه اداره د دې پلان موخه د سرپناه چمتو کول بولي.
دا په داسې حال کې ده چې په هرات ولایت کې د تلې په ۱۵مه د خونړۍ زلزلې له امله د دغه ولايت زرګونو اوسېدونکو ته ډېر مالي او ځاني زيانونه ورسیدل.
له زلزلې وروسته ګڼ کورونه ويجاړ شوي او ډیری زیانمنې کورنۍ اوسمهال د ژمي په سړه هوا کې تر خيمو لاندې ژوند کوي.
سره له دې چې د ايران، چين، ترکيې او یو شمیر نورو هېوادونو او نړیواله مرستندویه ادارو له خوا د هرات ولایت له زیانمنو کسانو سره مرستې شوي، خو د دغه ولايت اوسېدونکي لا هم د خپل ژوند له ناوړه شرايطو شکايت کوي.
