د اسراییل پوځ اعلان وکړ، چې حماس د اوربند د ماتولو وروسته د دغه هېواد پر لوري توغندی توغولی او د دوی پوځ هم د حماس پر مورچلو ډزې پیل کړې دي. اسراییلي پوځ ویلي، هغه توغندی چې د غزې له لوري پر دوی توغول شوی و هغه یې په هوا کې شنډ کړی دی.
دغه توغندی د اسراییل او حماس تر منځ د شوي اوربند یو ساعت وروسته توغول شوی، چې ورسره هم مهاله د خطر زنګ هم غزې سره په نږدې سیمو کې اورېدل شوی دی.
فلسطیني رسنیو راپور ورکړی، چې اسراییلي پوځ د غزې تړانګې په سویل لویدیځه څنډه خان یونس ته نږدې د عبسان ښار پمبارد کړی دی.
تر دې څو ساعته وړاندې وال سټریټ ژورنال د مصري چارواکو له قوله راپور ورکړ، اسراییل او حماس هوکړه کړې چې لنډمهاله اوربند به اتمې ورځې ته هم غځوي.
دا رنګه ویل شوي و، چې د دغې هوکړې له مخې لس نور یرغمل شوي کسان چې زیاتې یې ښځې او ماشومان دي، د حماس له یرغمله خوشې کېږي.
