د هندوستان په سېلاو ځپلي چینای کې سلګونه کسان لا هم خپلو کورونو او کارځیو کې بند پاتي دي

AP ۱۴۰۲ لیندۍ ۱۷

سره له دې چې چینای ښار کې د سیلاوونو له راوتلو څلور ورځې تیریږي، خو د دغه صنعتي ښار کې په کوڅو او واټونو کې د اوبو د شتون له امله فابریکې تړلې پاتې او رضاکاران په کورونو او کارځیو کې بندو کسانو ته ډوډۍ او نور اړتیا وړ شیان رسوي.

د رویټرز خبري اژانس د خبر له مخې دغه سیلاوونه چې د دوشنبې په ورځ تر سختو ورښتونو وروسته راوتلي وو په چینای ښار او تامل ناډو ایالت کې یې لږ تر لږه ۱۴ کسان وژلي دي.

د چارواکو په وینا د دغه ایالت ځینې ټیټې سیمې لا هم تر اوبو لاندې ډوبې دي.

حکومتي چارواکي او رضاکاران په کلیو او نورو سیمو کې په خپلو کورونو کې بندو کسانو ته د هغوی د اړتیا وړ خوراکی توکي ورسوي.

د کوریايي هیونډای موټرو او اپل کمپنۍ په ګډون د بیلابیلو نړیوالو شرکتونو هندي څانګې د هندوستان چینای کې فعالیت کوي.

د معلوماتي ټیکنالوژۍ خدماتو وړاندې کوونکو خپلو کارکوونکو ته ویلي چې د دې اونۍ لپاره دې له کوره کار وکړي.

په ټوله سیمه کې ښوونځي او پوهنتونونه تړل شوي. ځینې ښوونځي او پوهنتونونه په موقتي ډول د سیلاو ځپلو لپاره د سرپناه په توګه کاروکول کیږي.‌

اته کاله وړاندې په دغه سیمه کې د پراخو سیلاوونو له امله ۲۹۰ کسان وژل شوي وو.‌

د هندوستان د دفاع وزیر رجنت سینګ د پنج شنبې ورځ سیمې ته ورغلی او اعلان یې کړی وو چې نوی ډیلی د تامل ناډو ایالت سره د دې سیلاوونو د ویجاړیو د جوړولو په خاطر د مرستو په دویمه جوپه کې ۵۴ میلیونه ډالر ورکوي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ