له اوکراین سره د امریکا د مرستو د ځڼډیدو په غبرګون کې د اوکراین لومړۍ میرمنې ویلي که نړۍ له دوی سره مرستې ونه کړي، دوی به د مرګ له ګواښ سره مخامخ شي.
د اوکراین لومړۍ میرمن اولینا زیلینسکي بی بی سی سره په مرکه کې خبرداری ورکړی چې هیواد یې له وژونکي ګواښ سره مخامخ دی ځکه چې د روسیې په وړاندې د روانې جګړې مالي او اخلاقي ملاتړ مخ په کمیدو دی.
نوموړې ویلي چې هیواد یې جدي مرستې ته اړتیا لري او دوی له مرستې غوښتلو، نه ستړي کیږي، که ستړي شي نو مړه به شي. هغې ویلي: “که نړۍ مونږ سره له مرستو ستړې شي، دوی به مونږ مرګ ته پریږدي.”
هغه وايي، د مرستو په برخه کې د پخوانۍ لیوالتیا د ختمیدو لیدل دوی سخت خپه کړي دي، ځکه دغه مرستې یوه حیاتي مساله ده.
د اوکراین د متحدینو نه د هغې د مرستې غوښتنه وروسته له هغه شوې چې سپینې ماڼۍ د دې اونۍ په پیل کې خبرداری ورکړی و چې متحده ایالات به د کانګرس له ملاتړ پرته اوکراین ته د وسلو چمتو کولو لپاره مالي سرچینې ونه لري.
د امریکا کانګرس د چهارشنبې په ورځ هغه مسوده رد کړه چې له مخې یې اوکراین ته ۱۵ ملیارده ډالره اضافي مرسته برابریده.
دغه پیسې به اوس د پوځي روزونو، د استخباراتي معلوماتو د شریکولو او په اروپایې هیوادونوکې د امریکا د حضور د ډیرولو لپاره وکارول شي.