د بښنې نړۍوال سازمان د بلوڅ اعتراض کوونکو نیول غندلي او له پاکستانه یې غوښتي، چې پرې لګېدلي تورونه لرې کړي. له بلې خواد بشري حقونو یوې نړۍوالې مدافع ډلې د دوشنبې په ورځ له بلوچستانه د اسلام اباد پر لور د لاریون کوونکو پر نیول کېدو اندېښنه څرګنده کړه.
لاریون وروسته له هغه پیل شو، چې د دغه هېواد په سوېل ختیځ ښار تربت کې خلکو د نومبر په میاشت کې د صوبې د ترهګرۍ ضد څانګې (سي ټي ډي) په چارواکو تور ولګاوه، چې د ۲۴ کلن بلاڅ بلوڅ تر وژنې وروسته یې په هغه د پنځه کیلوګرامه چاودېدونکو توکو د درلودلو تور ولګاوه.
د بلوڅ کورنۍ او د مدني ټولنې غړو شاوخوا دوه اونۍ په تربت کې اعتراضي لاریون وکړ او د سي ټي ډي چارواکو پر وړاندې یې په دې اړه د ګام اخیستو غوښتنه وکړه.
د بښنې نړۍوال سازمان په وینا، له دغې ډلې لږ تر لږه ۲۰ کسان د ډسمبر په ۱۷مه نېټه په داسې حال کې ونیول شول چې دوی د پنجاب صوبې له دېره غازي خان ولسوالۍ څخه په حرکت کې وو.
د بشري حقونو نړۍوال سازمان ویلي:« لاریونوال خوشې شوي دي او د لاریون جوړوونکو پر وړاندې یې ۳ جلا پېښې ثبتې کړې دي.»
د بښنې نړۍوال سازمان له پاکستاني چارواکو غوښتنه کوي، چې په سملاسي او غیر مشروط ډول د ټولو هغو کسانو پرضد ټول تورونه لرې کړي چې یوازې د بیان د ازادۍ له حقه د ګټې اخیستنې لپاره لګول شوي دي.»
دغه سازمان په پاکستان کې په ځانګړې توګه په بلوچستان کې د نړۍوالو معیارونو سره سم د ټولو غیر عدالتي وژنو او جبري ورکېدو د بې پرې پلټنو غوښتنه وکړه.
د بشري حقونو نړۍوال سازمان هم له پاکستاني چارواکو غوښتي، چې له محکمو پرته د وژل شویو قربانیانو او ورکو شویو خلکو کورنیو ته تاوان ورکړي.
دغه صوبه له ایران او افغانستان سره ګډه پوله لري او له نږدې دوو لسیزو راهیسې د بلوڅ ملتپالو لهخوا د ټيټې کچې د بغاوت ډګر و.
