طالبان: اوس مسافر کولی شي د فراه او بیرجند ترمنځ په ټکسي کې سفر وکړي
د طالبانو د ټرانسپورت وزارت اعلان کړی، چې د لومړي ځل لپاره د ایران او افغانستان ترمنځ د یوه خصوصي شرکت له لوري د ټکسي چلوونکو یوه ځانګړې څانګه جوړه شوې ده.
د طالبانو د ټرانسپورت وزارت اعلان کړی، چې د لومړي ځل لپاره د ایران او افغانستان ترمنځ د یوه خصوصي شرکت له لوري د ټکسي چلوونکو یوه ځانګړې څانګه جوړه شوې ده.
دغه وزارت د یوې خبرپاڼې په خپرولو سره ویلي، چې د افغانستان د فراه او د ایران د بیرجند ښارونو ترمنځ مسافر کولی شي، چې په ټکسي موټرو کې تګ و راتګ وکړي.
فراه د افغانستان د لویديځې برخې ولایت دی چې له ایران سره ګډه پوله لري.
اخوا بیرجند چې د سویلي خراسان مرکز دی؛ د ایران په ختیځ او د افغانستان په ګاونډ کې موقعیت لري.
د طالبانو د ټرانسپورت او هوانوردۍ وزارت په خبرپاڼه کې زیاته شوې ده، چې د ټکسي چلوونکو دغه څانګه د هوتک ټرانسپورتي نړۍوال شرکت له خوا جوړه شوې ده.
دغه وزارت د فراه او بیرجند ترمنځ د ټکسي د کارونو په اړه نور جزییات نه دي ورکړي.
د یادولو ده، چې ایراني چارواکو هم تر اوسه په دې اړه څه نه دي ویلي.
