د چین دولتي رسنیو راپور ورکړی، چې د سه شنبې په سهار د ریښتر په کچه ۷.۱ درجې زورورې زلزلې د قرغزستان سرحدي سیمې او د سین کیانګ ځېنې برخې ولړزولې. لومړني راپورونه وايي، چې د دغې زلزلې له امله یو شمېر کسان ټپیان شوي او ځینې کورونه نړېدلي دي.
د چین د زلزلې مرکز ویلي، چې دغه زلزله د سهار په ۰۲:۰۹ دقیقو د سین کیانګ په ووشي ولسوالۍ کې چې شمال لویدیځ لورې ته پرته ده، شوې ده.
په چین کې د خواله رسنیو کاروونکو ویلي، چې د زلزلې ټکانونه په اورمچي، کورلا، کاشغر، یینینګ او د هغو په شاوخوا سیمو کې احساس شوي دي.
شینهوا راپور ورکړی، چې د سین کیانګ د اوسپنې پټلۍ سمدلاسه خپل فعالیت ځنډولی او د راپورونو له مخې ۲۷ کتارونه د دغې زلزلې له امله اغېزمن شوي دي.
د چین د بېړنیو حالاتو وزارت ویلي، د بېړنیو مرستو ډلې یې سیمې ته لېږلي دي.
د راپورونو له مخې، په تېرو ۲۴ ساعتونو کې د چین سین کیانګ سیمه د څو پر له پسې زلزلو شاهده وه.
