د افغانستان د پخواني ولسمشر محمد اشرف غني لومړی مرستیال امرالله صالح د امریکا له لوري طالبانو ته هره اوونۍ د ډالري کڅوړو لیږلو په غبرګون کې نن دوشنبه د (سلواغې نهمه) په خپله ایکس پاڼه لیکلي چې، له طالبانو سره د دوحې تړون او د دې ډلې پیاوړي کول به امریکا تل وځوروي.
همدارنګه نوموړي په امریکا کې د اوباما د حکومت پر مهال په ۲۰۱۰ او ۲۰۱۴ کلونو کې د بګرام له هوايي اډې څخه د شپې مهال په پټه د امریکايي ځواکونو وتلو ته هم اشاره کړې.
د افغانستان پخواني حکومت دغه چارواکی وايي په میاشت کې د دغو ۸۰ میلیوني ډالرو د کڅوړو یو اصلي ګټه اخیستونکی د دغې ډلې د کورنیو چارو وزیر سراج الدین حقاني دی هغه څوک چې خپله امریکا د نوموړي پر سر ۱۰ میلیون ډالر جایزه ایښې ده.
د پخواني ولسمشر لومړی مرستیال امرالله صالح دغه څرګندونې پر داسې مهال کوي چې د امریکا له لوري هره اوونۍ شل میلیونه ډالري کڅوړې افغانستان ته استول کیږي.
