د پاکستان د تحریک انصاف ګوند مشر او پخوانی لومړی وزیر عمران خان او د دغه هېواد د بهرنیو چارو پخوانی وزیر شاه محمود قریشي د دولتي رازونو د افشا په قضیه کې په لس، لس کاله بند محکوم شوي دي.
د دولتي رازونو د افشا په ځانګړې محکمه کې قاضي ابوالحسنات ذوالقرنين په اډياله زندان کې د عمران خان او شاه محمود قريشي د دولتي رازونو د افشا کولو په قضیه کې د دواړو په حضور کې پرېکړه اورولې ده.
له دغې پرېکړې سره هممهاله عمران خان له خپلو پلویانو غوښتي، چې د محکمې د پرېکړې خلاف واټونو ته راووځي او احتجاجونه وکړي.
تر دې وړاندې د اسلام اباد سترې محکمې د عمران خان هغه غوښتنلیکونه رد کړي وو، چې له مخې یې د حکومت رسمي رازونو د افشا کولو په اړه د قضیې لغوه کولو او د ضمانت غوښتنه کړې وه.
عمران خان ویلي و، چې امریکا مسکو ته د هغه له سفر وروسته د هغه د ګوښه کولو غوښتنه وکړه.
خان خپل سیاسي سیالان او د پاکستان د پوځ پخوانی مشر جنرال قمر جاوید باجوه د هغه د لرې کولو په برخه کې له واشنګټن سره په همکارۍ تورن کړي و.
خان د اګست له پنځمې راهیسې له هغه وروسته په زندان کې دی، چې په یوه جلا قضیه کې د دولتي ډالیو په پلور محکوم شو.
نوموړی په لومړي سر کې په اټک زندان کې ساتل کېده؛ خو وروسته اډیاله زندان ته ولېږدول شو.
