ځینو سرچېنو افغانستان انټرنشنل پښتو ته ویلي، چې طالبانو د مېملې په لرغوني بڼ کې د نرګس ګل په مشاعره کې د هغو شاعرانو له ورتګه مخنیوی کړی چې پر طالبانو یې نېوکې کولې. په دغې مشاعره کې ګڼو هغو طالب پلوه شاعرانو برخه اخېستې وه، چې د طالبانو په پلوۍ یې شعرونه ویل.
دغه مشاعره د لومړي ځل له پاره په ۱۳۹۳ کال کې ترسره شوه او هر کال په دغه موسم کې چې د نرګس ګلانو موج وي تر سره کېږي؛ خو په افغانستان کې د طالبانو له واکمنېدو وروسته د دغې مشاعرې د سمبالښت چارې هم دغې ډلې پر ځان پسې تړلي او هغو بنسټګرو شاعرانو ته یې هم د ګډون برخه نه ده ورکړې، چې د دغې مشاعرې بنسټ یې د لومړي ځل لپاره اېښی و.
سږنۍ مشاعرې ته له کابله د طالبانو د اطلاعاتو او فرهنګ د وزیر ملا خیرالله تر څنګ ګڼ طالب چارواکي ورغلي وو او له شاعرانو یې غوښتنه دا وه، چې خپل شعرونه دې د اسلامي شریعت سره سم ولیکي.
د مېملې بڼ هغه تاریخي بڼ دی، چې له ننه شاوخوا پنځه پېړۍ مخکې د شاه جهان پاچا لهخوا د هغه د لور نېملې په نامه جوړ شو، چې وروسته بیا د نېملې نوم په مېمله بدل شو.
دغه بڼ چې د خوګیاڼیو په ولسوالۍ کې د جلال اباد له ښاره لرې په ۴۵ کیلومترۍ کې پروت دی د نرګسو زرګونه بوټي په طبیعي بڼه په کې راشنه کېږي او د کال په دغه موسم کې د دغه باغ او شاوخوا سیمو چاپېریال د نرګس ګل پر وږمو معطر وي.
د دغه بڼ نرګس به تر دې وړاندې د پلازمېنې کابل تر څنګ د نړۍ یو شمېر نورو هېوادونو ته هم لېږل کېده او خورا زیات مینهوال یې لرل.
