په افغانستان کې د ملګرو ملتونو د بشري مرستو د همغږۍ دفتر (اوچا) له افغانستان سره د جرمني پنځه میلیونه یورو اضافي مرسته اعلان کړه. دغه دفتر زیاته کړه، چې دغه پیسې د افغانستان د بشري مرستو صندوق ته ورکړل شوې دي.
اوچا د دوشنبې په ورځ (سلواغې ۱۶مه) په اېکس ټولنیزه شبکه کې په خپله رسمي پاڼه کې له افغانستان سره د جرمني د دې اضافي مرستو مننه وکړه.
جرمني تېر کال په افغانستان کې د بشري مرستو د رسولو لپاره پنځه میلیونه یورو مرسته کړې وه.
د اوچا د راپور له مخې؛ په افغانستان کې د بشري مرستو د صندوق له جوړېدو راهیسې دغه هېواد له دې صندوق سره څه باندې ۲۱۰ میلیونه یورو مرسته کړې ده.
