د بښنې نړیوال سازمان د سویلي اسیا سیمه ییز دفتر، د پنجشنبې په ورځ – سلواغې ۱۹ مه - په یوې اعلامیه کې ویلی، چې د ټاکنو په ورځ د مخابراتي او انټرنیټي خدمتونو د ځنډولو پریکړه د بیان ازادۍ او سوله ییزې غونډو پر حقونو یو ښکاره برید دی.
د بخښنې نړیوال سازمان پر پاکستاني چارواکو غږ کړی چې په سمدستي توګه انټرنیټ ته د لاس رسي محدودیتونه لرې کړي.
د بخښنې نړیوال سازمان د سویلي اسیا مرستیالې لیویا ساکاردي وايي: “معلوماتو ته د خلکو د لاسرسي مخه نیول، یوه بې پروايي ده، ځکه چې خلک د ویجاړونکو بمي چاودنو پر مهال د رایې ورکولو مرکزونو ته ځي. د دغو خدمتونو د بندولو له امله پر اپوزیسیون هم سخت فشار راغلی دی.”
ښاغلي ساکار ویلي، چې د پاکستان د مخابراتو د ادارې او د پاکستان د انتخاباتو د کمیسیون له خوا د ډاډ ورکولو سربیره، د معلوماتو په خپرولو باندې غیر ضروري بندیزونه، په دې حساس وخت کې د خلکو د بشري حقونو څخه سرغړونه ده.
د پاکستان د مخابراتو ادارې د تېرې ورځې له اعلان سره چې په دغه هیواد کې به ټیلیفوني شبکې په عادي ډول فعالیت کوي، نن سهار پنجشنه د (سلواغې ۱۹مه) اته بجې په لاهور، اسلام اباد، کراچۍ، ملتان، حیدراباد، کوئټه، پیښور او نورو لویو ښارونو کې د ګرځنده ټلیفونو شبکې بندې شوې دي.
پاکستاني رسنیو خبر ورکړی چې د ټاکنو له پیل سره سم په ټول پاکستان کې ټیلیفوني اړیکې پرې شوې دي او خلک نه شي کولی یو له بل سره اړیکې ټينګې کړي.
پاکستاني رسنیو په تېره د دغه هیواد د مخابراتو ادارې(پي ټي اې) له قوله ويلي چې د ټاکنو په ورځ به ټیلیفوني شبکې نه بندوي.
د پاکستان کورنیو چارو وزارت هم د یوې اعلامیې له لارې ویلي چې ټیلیفوني شبکې یې د خلکو د خوندیتوب لپاره په موقت ډول تړلې دي.
