د جنرال سمیع سادات په مشرۍ د افغانستان متحدې جبهې په یوه اعلامیه کې د طالبانو پر ضد د نظامي عملیاتو د پیلولو اعلان وکړ. دغه جبهه وایي، د طالبانو هغه مشران به یې اصلي هدف وي چې پر پخوانیو ځواکونو او ښځو یې ظلمونه کړي. جبهې ځان د هېواد د اساسي قانون او ملي بیرغ وارث بللی.
د افغانستان متحدې جبهې د زمري په ۱۰مه په یوه اعلامیه کې وویل، چې د جبهې مشر ډګر جنرال سمیع سادات خپلو ځواکونو ته د جګړې د پیل امر کړی دی.
په اعلامیه کې راغلي چې د دې جبهې پوځي کمیسیون د افغانستان د ازادۍ او خلکو ته د واک د بېرته سپارلو لپاره د عملیاتو مسوولیت پر غاړه اخیستی دی.
د جبهې په وینا، د طالبانو هغه مشران او غړي چې په تېرو پنځو کلونو کې یې پر پخوانیو امنیتي ځواکونو، افغان ښځو، نجونو او ځوانانو ظلم کړی او هغوی یې وژلي، د دوی د بریدونو اصلي هدفونه دي.
د افغانستان متحدې جبهې ټینګار کړی چې ځان د هېواد د اساسي قانون، درې رنګه ملي بیرغ او ملي ارزښتونو وارث بولي او د خلکو د ارادې او عدالت لپاره خپلې مبارزې ته دوام ورکوي.
دغه راز په اعلامیه کې ویل شوي چې د دوی ځواکونه به د جګړې د فقهي اصولو او نړیوالو بشردوستانه قوانینو په رڼا کې عملیات کوي او د ملکي وګړو د سر او مال ساتنه به وکړي.
یادې جبهې د افغانستان له ټولو وګړو، په ځانګړې توګه له ځوانانو غوښتي چې په دې مبارزه کې ورسره ملګري شي او د افراطیت د ریښو په ایستلو کې برخه واخلي.
دغه راز په اعلامیه کې ژمنه شوې چې د قانون د واکمنۍ له بېرته ټینګښت وروسته به افغانستان د ټولو افغانانو لپاره خوندي کور وي او هېڅ ترهګرې ډلې ته به په هېواد کې د فعالیت اجازه ورنه کړل شي.
د پخوانۍ ملي اردو د جنرال سمیع سادات په مشرۍ د دغې جبهې سرچینو افغانستان انټرنشنل ته ویلي وو، چې دغې جبهې د طالبانو پر ضد خپل وسله وال فعالیتونه له کندهار ولایت څخه چې د طالبانو د مشر هبت الله اخوندزاده د واکمنۍ اصلي مرکز بلل کېږي، پیل کړي دي.
