د طالبانو امربالمعروف وزارت محتسبانو په غزني کې د یوې نا دولتي موسسې ښځينه او نارینه کارکوونکو ته ویلي چې په یوه دفتر کې کار و نه کړي او په جلا موټرونو کې سفر وکړي. طالبان وايي، د ښځینه او نارینه په یو ځای کار کول د شریعت خلاف کار دی.
د طالبانو امربالمعروف او نهي عن المنکر او شکایتونو اورېدو وزارت نن چهارشنبه د (کب دویمه) نېټه په ایکس پاڼه لیکلي چې د دغه وزارت محتسبانو په غزني کې د (پي یو ایم آی) موسسې کارکوونکي له ګډ سفر کولو او په یوه ځای له کار کولو منع کړي دي.
د دغه وزارت د معلوماتو له مخې د دې تر څنګ یې نارینه او ښځینه کارکوونکو ته امر کړی چې پنځه وخته لمونځونه دې په «جماعت» سره وکړي.
د پي یو ایم آی په نوم دغه نا دولتي موسسه د غزني په لرې پرتو ولسوالیو کې روغتیايي خدمتونه وړاندې کوي او لرې پرتو سیمو ته ګرځنده روغتیايي ډلې لیږي چې په هغو کلیو کې د خلکو درملنه وکړي او دوی ته په روغتیايي برخه کې سپارښتنې وکړي.
د دغې موسسې یوه موټر چلوونکي د نوم نه ښودلو په شرط افغانستان انټرنشنل پښتو څانګې ته ووويل چې د یادې موسسې ښځینه او نارینه روغتیایي ډلې لرې پرتو ولسوالیو ته په موټر کې وړي، هغه وايي: «زه خپله ډاکتران او ډاکترانې په یوه موټر کې وړم، موسسه خو دومره پیسې نه لري چې جلا جلا ټولو ته موټر کرایه کړي، او بله خبره داده چې که ښځې او نارینه ډاکتران سره جلا هم شي خو ډرایور بیا نارینه شو، خو بس امربالمعروف په داسې شیانو کې کار لري چې خلک له هر څه زړه توري کوي.»
تېره ورځ یوه بل طالب چارواکي غونډې ته د خبرو پر مهال ويلي چې خبریالان دې هم ږېرې پرېږدي او د انځورونو له اخیستلو دې ډډه وکړي.
تر هغه وړاندې د کندهار لپاره د طالبانو والي ملا شیرین د یوه لیکلي مکتوب له لارې په دغه ولایت کې په رسمي او نارسمي ناستو کې د انځور او ویډیو په اخیستلو بندیز لګولی دی.
