په غزني کې د طالبانو د اطلاعاتو او کلتور ریاست وايي، د دې ډلې درې ګونو محکمو د پریکړې او د دغه ډلې د مشر د فرمان د توشیح په اساس سبا دوه کسان د غزني ښار د علي لالا کلي د فوټبال سټیډیم کې قصاص کیږي. په خبرپاڼه کې د یادو کسانو د هویت او جرم په اړه څه نه دي ویل شوي.
طالبانو «د عبرت په موخه» د غزني ښار خلک ددغو کسانو د قصاص د لیدو لپاره بللي دي.
له دې سره، له خلکو غوښتل شوي چېد ویډیو او انځور اخېستو د مخنیوي لپاره د مبایلونو، کمرو او د نورو الکترونیکي توکو له راوړلو ډډه وکړي.
پر افغانستان د طالبانو له بیا واکمنۍ وروسته دا دویم ځل دی چې دا ډله د قصاص حکم عملي کیږي.
د قصاص لومړی حدود په فراه ولایت کې تیر کال عملي شول چې له پراخو کورنیو او بهرنیو غبرګونونو سره هم مخ شو.
طالبان په داسې حال کې په افغانستان کې د قصاص او درو حدود عملي کوي، چې پر دغه ډله د بې ګناه وژنو ادعاوې شته.
که څه هم په عام محضر کې قصاص او په درو وهل له بشري حقونو سرغړونه بلل کیږي، خو طالبان وایي چې شرعي حکم عملي کوي.
