طالبانو د پروان ولایت په بېلابېلو سیمو کې د شاوخوا ۳۰۰ امنیتي کمرو د لګولو خبر ورکړی، چې له دغو امنیتي کمرو څخه یو شمېر یې د پروان ـ بغلان او د پروان ـ بامیان په لارو کې لګول شوي.
د طالبانو سیمه ییز چارواکي وايي، چې دا کمرې یې د "جرایمو د مخنیوي او د امنیت د ټینګښت" لپاره لګولي دي.
د طالبانو تر واک لاندې ملي ټلویزیون د دوشنبې په ورځ (د کب ۷مه) د یاد ولایت د امنیه قوماندانۍ په حواله د دغو کمرو د لګولو خبر ورکړی.
د طالبانو د کورنیو چارو وزارت وايي، چې په کابل او نورو ښارونو کې د امنیتي کمرو لګول د دغه وزارت د پنځه کلن ستراتیژیک پلان یوه برخه ده.
تر دې مخکې رسنیو خبر ورکړی وو، چې طالبانو د دغو کمرو د لګولو په برخه کې له چینايي شرکتونو مرسته غوښتې وه.
طالبانو په ځینو ښارونو په تېره بیا کابل کې د کورونو خاوندان اړ کړي، چې په کوڅو کې امنیتي کمرې ولګوي.