یوه سوداګره او د ښځو د حقونو فعاله لیلا حیدري، چې تازه یې له افغانستان څخه په هالنډ کې پناه اخیستې وايي ښځې د طالبانو د بندیزونو له امله له درده ډک ژوند تېروي.
مېرمن حیدري د نجونو پر ملاتړ د ټینګار ترڅنګ زیاتوي، د افغان مېرمنو کړاو د ډېرو لپاره د عاید سرچینه ګرځېدلې ده.
د «مور معتادینو کمپ» بنسټګره لیلا حیدري نن پر خپله اېکس پاڼه ليکلي، چې درې ورځې وړاندې له افغانستانه وتلې او هالنډ ته تللې ده.
اغلې حیدري په کابل کې د «تاج بیګم» په نوم یو رسټورانټ هم جوړ کړی و، چې د معتادینو د کمپ لګښتونه به یې په پوره کول.
د ښځو د حقونو دغې فعالې، چې کلونه کلونه یې عادي ژوند ته د نشه یانو د ستنولو لپاره کار کړی لیکلي، چې ډېر لږ کسان غواړي د افغان ښځو او نجونو لپاره صادقانه کار او پانګونه وکړي.
هغې پر خپله اېکس پاڼه ليلکي: «افغانستان واقعا خپل تور دور ته ستون شوی دی. خلک په زرګونو ډوله ځورول کیږي. خلک د ژوندي پاتې کیدو لپاره جنګیږي او په دې هیواد کې د ښه ژوند هیله مړه شوې ده.»
طالبانو له دوو کلنو زيات د ښځو پر تعلیمي، مسلکي او ټولنیز ژوند پراخ بنديزونه لګولي دي.
دې بنديزونو ډیرې فعالې او سوداګرې میرمنې دې ته اړ کړې چې هیواد پریږدي.
طالبانو تر شپږم ټولګي پورته د نجونو پر زدکړو بندیز لګولی او د نجونو پر مخ یې د پوهنتونونو دروازې هم تړلې دي.
په دې وروستیو کې ملګرو ملتونو اعلان وکړ، چې د ښځو پر وړاندې د طالبانو د بندیزونو له امله د افغانستان اقتصاد ته تر یو میلیارد ډالرو پورې زیان رسېدلی دی.