اسراییلي پوځ د سه شنبې په ورځ اعلان وکړ، چې د غزې د جګړې له پیله یې د لبنان پر حزب الله او سوریې ۴۵۰۰ بریدونه کړي دي. د دغه هېواد د پوځ په وینا، په دغو بریدونو کې د حزب الله ډلې د پنځو لوړپوړو قوماندانو په ګډون تر ۳۰۰ ډېر غړي وژل شوي دي.
ورته مهال د اسراییل لومړي وزیر ادعا کړې، چې لږ تر لږه د حماس ۱۳ زره جنګیالي د اسراییلي سرتېرو سره په جګړه کې وژل شوي دي؛ خو حماس د غزې په جګړه کې د خپلو سرتېرو د تلفاتو دغه شمېره رد کړې ده.
اسراییلي پوځ ویلي، په سوریې او لبنان کې یې د حزب الله پر موخو، د وسلو په انبارونو، تاسیساتو، د قومندانۍ پر مرکزونو او د توغندیو د توغولو پر ځایونو یې بریدونه کړي دي.
اسراییلي پوځ ادعا کړې، چې د ایران تر ملاتړ لاندې پر حزب الله پرلپسې بریدونو د دغې ډلې پوځي وړتیا لمنځه وړې ده.
د غزې د جګړې له پیلېدو سره د لبنان حزب الله د حماس په ملاتړ د اسراییل پر سرحدي سیمو توغندیز بریدونه وکړل او د اسراییل په پوځي اډې یې هم برید وکړ؛ خو تر اوسه یې د اسراییل پر ضد په پراخه کچه جګړې ته له ننوتلو ډډه کړې ده.
اسراییل هم د دغو بریدونو په غبرګون د حزب الله او په لبنان او سوریه کې د ایران د سپاه پاسداران پر پوستو بریدونه وکړل.
