د طالبانو د اوسپنې پټلۍ اداره وايي، چې د یوې اوونۍ په لړ کې یې ۸۱ زره او ۵۵۹ مټرېک ټنه صادارت او واردات کړي دي. یاده اداره وايي، دغه صادرات او واردات یې د ۱۴۰۲ کال د کب میاشتې له ۱۱مې تر ۱۷مې نېټې پورې کړي دي.
دغې ادارې سه شنبه د (کب ۲۲مه) په اېکس پاڼه لیکلي چې په لېږدول شویو توکو کې نفتي او خوراکي توکي شامل دي.
د طالبانو د اوسپنې پټلۍ اداره وايي، د حیرتان بندر د اوسپنې پټلۍ له لارې یې ۶۶ زره او ۶۱۳ ټنه، د اقینې بندر د اوسپنې پټلۍ له لارې شپږ زره او ۲۰۱ ټنه او د تورغونډۍ بندر د اوسپنې پټلۍ له لارې اته زره او ۷۴۵ ټنه توکي لېږدول شوي چې ټول شمېر ۸۱ زره او ۵۵۹ ټنه نفتي، غیر نفتي او نور توکي، هېواد ته وارد او بهر ته صادر شوي دي.
د دغه شمېر لېږدول شویو توکو له ډلې یوه برخه ټرانزيټ او صادرات دي چې په دې اوونۍ کې ۲۶۰ ټنه صادر شوي، چې د دې ډیره برخه د انارو اوبه (جوس) دي.
تر ډیره پورې د طالبانو پر رژیم نیوکې کیږي چې معلوماتو ته لاسرسی یې محدود کړی او چاته هم د داسې شمېرو د کره کولو او یا معلوماتو غوښتلو اجازه نه ورکوي.
تېره اوونۍ د طالبانو د اوسپنې پټلۍ ادارې ویلي و، چې د یوې اوونۍ، د کب له څلورمې تر لسمې نیټې پورې یې ۹۰ زره او ۱۹۴ مټرېک ټنه صادارت او واردات کړي دي.
دغې ادارې دا نه دي ويلي چې دغه توکي یې له کومو هیوادونو وارد او کومو هیوادونو ته یې صادر کړي خو وايي، دوی به خپلو صادراتو او وارداتو ته په راتلوونکي کې لا مناسب شرايط برابروي.
د افغان سوداګرو نیوکې دادي چې طالبان په سوداګریزو او نورو چارو کې ملګرتیا پالي او هغه څوک چې د دوی له چارواکو سره ښې اړېکې لري، سوداګریزې چارې یې سمې روانې دي.
د طالبانو د اوسپنې پټلۍ ادارې ویلي، چې د روان مالي کال د سلواغې میاشتې په ترڅ کې د هېواد د اوسپنې پټلۍ له لارې، ۳۸۱ زره ۴۶۹ مټریک ټنه توکي لیږدول شوي دي.
د طالبانو تر کنټرول لاندې باختر اژانس د دغې ډلې د اوسپنې پټلۍ ادارې د معلوماتو له مخې راپور ورکړی، چې په یوه میاشت کې د حیرتان بندر له لارې ۳۱۲ زره ۵۳ ټنه، د اقینې بندر له لارې ۲۸ زره ۱۳۳ ټنه او د تورغونډۍ بندر له لارې ۳۷ زره ۵۹۵ ټنه چې ټولټال ۳۷۸ زره ۲۵۳ ټنه نفتي او خوارکي توکي دي افغانستان ته وارد شوي.
دا په داسې حال کې ده، چې په مرغومي میاشت کې د افغانستان اوسپنې پټلۍ له لارې ۳۸۶ زره ۶۴۹ مټریک ټنه انتقالات شوي چې له هغې ډلې ۳۰۰۲ مټریک ټنه یې صادراتي توکي وو.
د طالبانو د اوسپنې پټلۍ اداره وايي، چې د ۱۴۰۲ کال په اوږدو کې یې د افغانستان حیرتان بندر د اوسپنې پټلۍ له لارې ۲.۸ میلیون ټنه صادرات او واردات کړي دي.
خو د دغو شمېرو د کره والي په اړه د افغانستان انټرنشنل سره داسې مالومات نه شته چې دغه ادعاوې ثابتې کړي او نه هم دننه په افغانستان کې داسې خپلواکې سرچینې شته، چې د طالبانو تر کنټرول لاندې ادارو دغه ادعاوې دې کره کړي.
