د ملګرو ملتونو سرمنشي انتونیو ګوترېش وایي، چې د غزې په شمالي برخه کې روانه قحطي په بشپړ ډول یو انساني ناورین دی. هغه په اېکس پاڼه یوځلې بیا د اوربند غوښتنه کړې او لیکلي یې دي:« زه د سملاسي بشري اوربند لپاره خپله غوښتنه یو ځلې بیا تکراروم.»
هغه لیکلي:« موږ باید همدا اوس اقدام وکړو؛ ترڅو د نه منلو وړ، د نه تصور وړ او د نه توجېه وړ کړنو د رامنځته کېدو مخه ونیسو.»
تر دې وړاندې ملګرو ملتونو ویلي و، چې د اسراییل په بریدونو کې له ۱۳۰۰۰ ډېر ماشومان وژل شوي دي.
دغه سازمان په غزه کې د پراخې خوارځواکۍ خبرداری هم ورکړی و او د چارواکو په وینا، ماشومانو ان د ژړا انرژي او توان هم له لاسه ورکړی.
د مرستندویه سازمانونو په وینا، اوسمهال د غزې په شمال کې له هرو درېیو ماشومانو یو یې په سختې خوارځواکۍ اخته دی.
