د روغتیا نړۍوال سازمان د کندهار له میرویس روغتون سره د درملو او تجهیزاتو مرسته کړې
د روغتیا نړۍوال سازمان د کندهار ولایت له میرویس روغتون سره د ۸۵ ټنه درملو او روغتیایي تجهیزاتو د مرستې خبر ورکړ.
د روغتیا نړۍوال سازمان د کندهار ولایت له میرویس روغتون سره د ۸۵ ټنه درملو او روغتیایي تجهیزاتو د مرستې خبر ورکړ.
دغه سازمان د یکشنبې په ورځ (د وري ۱۲مه) په خپل اېکس کې لیکلي، چې په دغو مرستو کې بېړني کیټونه، د غیر ساري ناروغیو او د عملیاتو او پانسمان توکي شامل دي.
د روغتیا نړۍوال سازمان زیاته کړې ده، چې د افغانستان د سویلي ولایتونو په کچه میرویس روغتون یو له هغو فعالو روغتونونو څخه دی، چې شاوخوا شپږ میلیونه کسانو ته روغتیایي خدمتونه وړاندې کوي.
دا په داسې حال کې ده، په ۲۰۲۳ کال کې د یاد روغتون یو شمېر چارواکو په دې روغتون کې د درملو او روغتیایي تجهیزاتو د کمېدو خبر ورکړ.
یادو چارواکو تر هغه وروسته د درملو او روغتیایي تجهیزاتو د کمېدو په اړه اندېښنه څرګنده کړه، چې سره صلیب له دېرشو کلونو وروسته په ټول افغانستان کې خپلې مرستې محدودې کړې.
سره صلیب دغه روغتون ته د درملو او روغتیایي تجهیزاتو سربېره د ډاکټرانو تنخوا هم ورکوله.
