د پاکستان د بهرنیو چارو وزارت په یوه خپره کړې خبرپاڼه کې د سوریې په پلازمېنه دمشق کې د ایران سفارت اړوند پر کونسلګرۍ برید په کلکه غندلی دی. دغه برید تېره ورځ دوشنبه، دمشق کې د ایران پر کونسلګرۍ شوی چې له امله یې د سپاه دوو قوماندانانو په ګډون اووه افسران وژل شوي.
د پاکستان د بهرنیو چارو وزارت نن سه شنبه د (وري ۱۴مه) په یوه خبرپاڼه کې ويلي چې په دمشق کې د ایران سفارت اړوند د کونسلګرۍ پر ودانۍ برید د سوریې له ځمکنۍ بشپړتیا سرغړونه بللې او دغه برید یې د نړېوالو او ډیپلوماتیکو قوانینو خلاف کړنه ګڼلې ده.
په خبرپاڼه کې راغلي: «د ډیپلوماټانو یا ډیپلوماټیکو تاسیساتو په نښه کول د ۱۹۶۱ ډیپلوماټیکو اړیکو په اړه د ویانا کنوانسیون او د ملګرو ملتونو د منشور له مخې غیر قانوني عمل دی.»
خبرپاڼه کاږي چې دا ډول بریدونه به د سیمې امنیت او ټیکاو ته لا زیان ورسوي او د ملګرو ملتونو امنیت شورا یې باید مخه ونیسي، «د اسراييلي ځواکونو غير مسوولانه عمل په سوریې غوندې ناکراره سیمه کې د تاوتریخوالي بده پېښه ده. موږ د ملګرو ملتونو پر امنیت شورا غږ کوو چې په سیمه کې د اسراییل له یرغل او پر ګاونډیانو د بریدونو او د بهرنیو ډیپلوماتیکو بنسټونو په نښه کول چې یو غیر قانوني عمل دی، مخه ونیسي.»
د سوریې په پلازمینه دمشق کې د ایران کونسلګرۍ ودانۍ د دوشنبې په ورځ په یوه برید کې په بشپړه توګه ویجاړه شوې، چې د سوریې او ایران رسنۍ یې د اسراییل هوايي برید بولي.
د سپاه پاسداران د عامه اړیکو دفتر د دوشنبې په ورځ وویل چې په سوریه کې د ایران پر کونسلګرۍ د اسراییل په برید کې د سپاه پاسداران دوه قوماندانان او پنځه افسران وژل شوي دي.
د اکټوبر په اوومه د ایران په ملاتړ د فلسطیني ډلې حماس له خوا پر اسراییل له برید وروسته اسراییل په سوریه کې د لبنان د حزب الله ملېشې او د ایران د سپاه پاسداران د بهرنیو ګروپونو پر ضد چې دواړه د ولسمشر بشارالاسد د حکومت ملاتړ کوي، هوايي بریدونه زیات کړي دي.
دغه پېښه په منځني ختیځ کې د نښتو او تاوتریخوالي د زیاتېدو روښانه نښه ده، چې اسراییل د ایران او د هغه د ملګرو پر وړاندې دروي.
