د پاکستان د طبیعي پېښو پر وړاندې د مبارزې ملي ادارې د دوشنبې په ورځ وویل، چې په تېرو درېیو ورځو کې د تالندې، ورښتونو او سختو بارانونو له امله لږ تر لږه ۴۴ کسه مړه شوي دي.
دغه ورښتونه چې د جمعې په ورځ پیل شوي، د پاکستان په بېلابېلو برخو کې یې ډېر کورونه زیانمن کړي دي.
د دغې ادارې په وینا، په راتلونکو ورځو کې د نورو بارانونو اټکل هم کېږي.
دغې ادارې د دوشنبې په ورځ په یوه بیان کې ویلي:« دغه تلفات د پنجاب، بلوچستان، خیبر پښتونخوا، ازاد جمو او کشمیر او ګلګت بلتستان په ګډون د ټول هېواد څخه راپور شوي دي.»
یوازې په پنجاب کې چې د پاکستان تر ټولو لویه او ګڼ مېشته صوبه ده، د جمعې او یکشنبې تر منځ د تالندې له امله ۲۱ کسان په کې وژل شوي دي.
د دغې ادارې د بیان له مخې، بارانونو په بلوچستان کې ۳۷، په خیبر پښتونخوا کې ۱۵ او په ازاد کشمیر کې شپږ کورونه زیانمن کړي دي.
ورته مهال، د بلوچستان په مرکز کوټه کې د جمعې ورځې راهیسې د پرله پسې بارانونو له امله صوبايي حکومت د باران او سېلاب بېړنی حالت اعلان کړی دی.
په کوټه او نورو ولسوالیو کې د ژغورنې او د اوبو اېستلو عملیات هم روان دي.
د بلوچستان ایالتي حکومت ویاند په کوټه کې خبریالانو ته ویلي:« د سختو بارانونو له کبله د بلوچستان حکومت د راتلونکو دوو ورځو لپاره د دولتي او خصوصي ښوونځیو د تړلو پرېکړه کړې ده.»
په تېرې مارچ میاشت کې د بلوچستان په ګوادر او کېچ ولسوالیو کې سېلابونه راوتلي وو، چې نږدې ۱۰۰ کورونه یې ویجاړ کړي وو او لږ تر لږه پنځه کسان یې وژلي وو.
په ۲۰۲۲کال کې د مون سون بارانونو د پاکستان په تاریخ کې تر ټولو ویجاړوونکي سېلابونه تجربه کړل، چې شاوخوا ۱۷۰۰ کسان پکې ووژل شول او له ۳۳ مېلیونو څخه یې ډېر خلک اغېزمن کړل.
