څېړنه: افغان مېرمنې شخصي کاروبار غواړي خو پانګه او د بازار محدودیتونه ورته خنډ دي
د ملګروملتونو پرمختايي اداره وايي؛ د طالبانو حاکمیت کې چې پر ښځو د کار بندیز لګېدلی افغان مېرمنو شخصي کاروبار ته مخه کړې؛ خو پانګه او د خپل تولید لپاره بازار نه لري.
د ملګروملتونو پرمختايي اداره وايي؛ د طالبانو حاکمیت کې چې پر ښځو د کار بندیز لګېدلی افغان مېرمنو شخصي کاروبار ته مخه کړې؛ خو پانګه او د خپل تولید لپاره بازار نه لري.
د یو اېن ډي پي په سروې کې ګډونوالو د کاروالو ښځو له ۷۰ سلنې ډېرو دا هم ویلي، چې د طالبانو محدودیتونه د دوی د کاروبار خنډ دي او له نارینه محرم پرته مارکېټ ته تللی نه شي.
د ملګرو ملتونو د پراختیايي ادارې دا څېړنه نن خپره شوې او رویټرز خبري اژانس ورته کتنه کړې ده.
دې ادارې ته د ۳۱۰۰ هغو مېرمنو له ډلې چې ځان ته یې کار برابر کړی ۴۱ سلنه سره یې په پور متکي دي؛ خو په دوی کې پنځه سلنه ویلي چې د بانک یا مالي موسسې له لارې یې د کار لپاره پیسې ترلاسه کړې، نورو تر ډېره د خپلوانو دوستانو یا کورنۍ پر پیسو تکیه کړې ده.
په افغانستان کې د ملګرو ملتونو د پراختیايي ادارې یو غړی سټېفن رودریګوس وايي؛ افغانې مېرمنې د افغانستان د کورنۍ په ځان بساینه کې له ډېر وخت را هیسې محرکه قوه ده او د محلي اقتصاد په خوندیتوب کې مهم رول لري.
نوموړی وايي، د ځان بسیا افغانستان لپاره د مېرمنو نړۍوال ملاتړ پکار دی.
طالبانو رسما د ښځو پر کاربندیز نه دی لګولی؛ خو د دوی د مختلفو کارونو بندولو سره یې ښځې بې کاره کړې، لکه؛ د سینګارتونونو بندول یا هم له محرم پرته کار ته د دوی د تګ مخنیوی.
د طالبانو دې او ورته نورو قیوداتو سره په افغانستان کې د ښځو د کار کچه لا ټیټه شوې چې پر ۲۰۲۱ کال واک ته د دوی تر رسېدو مخکې هم ټیټه وه.
