د اسلامي همکاریو سازمان مرستیال د طالبانو د ریاست الوزرا له سیاسي مرستیال سره په لیدنه کې ویلي، چې د دغه سازمان غړي هېوادونه غواړي له افغانستان سره د مرستې په موخه یو پلاوی کابل ته ولېږي.
طارق علي بخیت له مولوي عبدالکبیر سره په لیدنه کې ویلي، چې اسلامي نړۍ او د اسلامي همکاریو سازمان له افغانستان سره د همکارۍ او مرستو په برخه کې ژمن دي.
طالبانو د یکشنبې په ورځ (د غویي ۲مه) د یوې خبرپاڼې په خپرولو سره د ښاغلي بخیت له قوله لیکلي، چې د داعش ډلې د ځپلو په برخه کې د طالبانو هڅې د ستایلو وړ دي.
په افغانستان کې د داعش ډلې شتون د طالبانو په ګډون د نړۍ ډېر شمېر هېوادونه اندېښمن کړي دي.
د طالبانو په خبرپاڼه کې دغه راز راغلي، چې د اسلامي همکاریو سازمان غواړي له افغانانو سره د مرستو او له طالبانو سره د نړۍ د تعامل په برخه کې هڅې وکړي.
له دې سره؛ مولوي عبدالکبیر په دې کتنه کې د اسلامي همکاریو له سازمان څخه غوښتي، چې د افغانستان او نورو هېوادونو د اړیکو په پراختیا کې مثبت رول ولوبوي.
نوموړي دغه راز له افغانانو سره د بشري مرستو په دوام هم ټینګار کړی.
مولوي عبدالکبیر وايي:"په افغانستان کې بشپړ اسلامي او خپلواک نظام حاکم دی او له ټولو هېوادونو سره ښې اړیکي لري او په سیمه کې د همکاریو د پراختیا، تعامل او ثبات غوښتونکی دی."
د یادولو ده، چې د ریاست لوزرا سیاسي مرستیال د اسلامي نړۍ له پانګوالو هم غوښتنه کړې، چې په افغانستان کې پانګونه وکړي.
ښاغلي بخیت په داسې حال کې له طالب چارواکو سره کتلي، چې ټاکل شوې د اسلامي همکاریو سازمان د بهرنیو چارو وزیرانو پنځلسمه غونډه په ګامبیا کې جوړه شي.
طالبانو د اسلامي همکاریو سازمان له مرستیال څخه غوښتي، چې د ګامبیا په ناسته کې باید دوی ته هم بلنه ورکړل شي.
دا په داسې حال کې ده، چې یاد سازمان له طالبانو په ځلونو غوښتي څو د نجونو پر وړاندې د ښوونځیو او پوهنتونونو دروازې پرانیزي؛ خو طالبانو تراوسه په دې برخه کې کوم اقدام نه دی کړی.
