د امریکا د بهرنیو چارو وزیر انتوني بلېنکن پر حماس غږ کړی، چې د غزې د اوربند او د دغې ډلې لهخوا د یرغمل شویو اسراییلي بندیانو د خلاصون په اړه د اسراییل وړاندیز په چټکۍ سره ومني.
په داسې حال کې چې قاهره د دوشنبې په ورځ (د غویي په ۱۰مه) د حماس مشرانو د اوربند د خبرو کوربه وه، ورسره هممهاله د اسراییل په هوايي بریدونو کې په لسګونو فلسطینیان ووژل شول، چې تر نیمايي زیات یې د غزې په رفح ښار کې وژل شوي وو.
د رفح له بریدونو څو ساعته وروسته د مصر دولتي ټلویزیون وویل، چې د حماس پلاوی له قاهرې دوحې ته روان شوی.
له دې سره هممهاله د امریکا ولسمشر جوبایډن او د مصر ولسمشر عبدالفتاح السیسي په غزه کې د اوربند په اړه د خبرو اترو د پرمختګ او د پوځي تاوتریخوالي د ګواښونو په اړه د ټیلیفون په لیکه خبرې وکړې.
د اسراییل پوځ د دوشنبې په ورځ وویل، چې دوه عسکر یې د یکشنبې په ورځ په مرکزي غزه کې وژل شوي دي.
د حماس د اسلامي جهاد څانګې هم ویلي، چې د دوشنبې په ورځ یې پر اسراییل توغنديز برید کړی او دا په ډاګه کوي چې دغه ډله د اسراییل له هوايي او ځمکنیو بریدونو اووه میاشتې وروسته لا هم د د دغه ډول بریدونو توان لري.
له بل پلوه بیا د اسراییل د پوځ ویاند ویلي، چې جنګي الوتکو "یې د غزې په سویل کې ترهګریز هدفونه په نښه کړي؛ خو په دې اړه یې د لا جزییاتو ورکولو ډډه وکړه.
د غزې د روغتیايي چارواکو په وینا، د اسراییل په پوځي عملیاتو کې تر دې مهاله ۳۴۴۸۸ فلسطینیان وژل شوي او ۷۷۶۴۳ نور ټپیان دي.
له دې سربېره، دغو نښتو ۲.۳ مېلیونه خلک بې ځایه کړي او د فلسطین یوه لویه برخه یې ویجاړه کړې ده.
