یوه امریکايي چارواکي واشنګټن پوسټ ته ویلي، امریکا له قطر غوښتي، که حماس اوربند رد کړي او د یرغمل کسانو پر سر معاملې ته دوام ورکړي ، باید له دغه هېواده وشړل شي. ځینو ډیپلوماټانو ویلي، چې قطر د حماس مشرانو ته سپارښتنه کړې، چې د وتلو د اړتيا پر مهال د ځان لپاره نوی ځای پیدا کړي.
د امریکايي چارواکو په وینا، د امریکا د بهرنیو چارو وزیر انتوني بلینکن د اپریل په میاشت کې د قطر لومړي وزیر محمد بن عبدالرحمان ال ثاني ته ویلي وو، چې له حماس سره د «حساسو خبرو اترو» په اړه خبري وکړي.
له دې موضوع خبرو درې ډيپلوماټانو وویل، چې دوی له میاشتو راهیسي د دې غوښتنې اټکل کړی و، خو په وروستيو اونيو کې د اوربند په اړه اوږد مهاله کړکېچ له امله دا تمې زياتې شوې.
یوه ډیپلومات ویلي، قطري چارواکو د حماس د سیاسي مشر اسماعیل هنيه په ګډون د دې ډلې نورو مشرانو ته، چې د قطر په پلازمېنه دوحه کې ژوند کوي، سپارښتنه کړې، چې له قطر څخه د وتلو د اړتيا پر مهال باید د اوسېدولو لپاره نوی ځای پیدا کړي.
پر همدې مهال ځيني سيمه ييز چارواکي او شنونکي خبرداری ورکوي، چې په دوحه کې د حماس د سياسي دفتر تړل د دې ډلې له مشرانو سره د خبرو اترو او د يرغمل شويو د خلاصون لپاره د راتلونکو خبرو اترو د بيا پيلولو هڅې پېچلې کوي.
بلينکن، چې د شاوخوا ۱۳۰ پاتې یرغمل شویو خوشې کولو او د غزې په جنوبي ښار رفح کې د اسراییلو د پلان شوي برید د مخنیوي په هدف منځني ختیځ ته راستون شوی، له حماس سره په خبرو کې د منځګړیتوب او د قطر له رول څخه مننه وکړه او دغه ډله یې وهڅوله چې د اسراییلو د اوربند وړاندیز ومني.
بلینکن د چهارشنبه په ورځ په تل ابیب کې وویل: «موږ هوډ لرو، چې د یرغمل شویو کورونو ته د رسیدو لپاره اوربند وکړو او یوازینی دلیل چې دا به نه کیږي حماس دی.»
قاهرې ته د حماس د پلاوي راتګ
د حماس یوه چارواکي رویټرز خبري اژانس ته ویلي، چې د دې ډلې یو پلاوی د شنبې په ورځ قاهرې ته رسیدلی دی.
تمه ده، چې دغه پلاوی به په غزه کې د اوربند او د یرغمل شویو بندیانو د خلاصون په اړه د اسراییلو وړاندیز ته لیکلي ځواب ورکړي.
د سي آی اې مشر هم په غزه کې د اوربند په اړه د خبرو لپاره مصر ته تللی دی.
رویټرز خبري اژانس د یو عیني شاهد له قوله ویلي، چې پولیس ودانۍ ته ننوتي او د ۷۰ څخه ډیر اعتراض کونکي یې نیولي دي.
د فرانسې په پوهنتونو کې لاریونونه د متحده ایالاتو تر ځینو پوهنتونونو سوله ییز وو او د تاوتریخوالي نښې نښانې پکې نه دي لیدل شوې.
ساینس پو پوهنتون په غزه کې د اسراییل د جګړې او له اسراییل سره د فرانسې د اکاډمیکو اړیکو په اړه د فرانسوي زدکونکو د لاریونونو مرکز ګرځیدلی دي.
دغه لاریونونه په ټوله فرانسه کې ترسره شوي، خو د امریکا په پرتله محدود پاتې شوي دي.
ساینس پو پوهنتون د جمعې په ورځ تړل شوی و او د دغه پوهنتون د مرکزي ودانۍ شاوخوا ډیر شمیر پولیسو ټول شوی وو.
د ساینس پو پوهنتون یو محصل چې د خپل نوم له ورکولو ډډه کوي، وايي، چې هغه د شاوخوا ۷۰ محصلینو څخه یو دی چې د پنجشنبې شپه یې د پاریس په مرکز کې د پوهنتون په یوه ودانۍ کې تیره کړه.
هغه د جمعې په سهار وویل، چې لاریونوالو د پوهنتون د چارواکو له خوا د ودانۍ د لویو برخو د پریښودو او یوې محدودې ساحې ته د راټولیدو په اړه ټاکل شوی نیټه رد کړې وه.
د ساینس پو پوهنتون یو ویاند د پولیسو له مداخلې وړاندې وویل، چې پوهنتون د خپلو زدکونکو سره د "د کړکیچ پای ته رسولو لپاره د خبرو اترو" په لټه کې دی.
په امریکايي پوهنتونونو کې پر غزې د اسراییل د جګړې پر ضد د فلسطیني زدکړیالانو لاریونونه روان دي او د لاریونیانو د نیولو لړۍ هم دوام لري.
په وروستیو پېښو کې، ۲۳ زدکړیالان د شنبې ورځ په انډیانا پوهنتون کې او ۱۰۲ نور په بوسټن کې د نورډ ایسټرن پوهنتون کې ونیول شول.
په بوسټن کې د نورډ ایسټرن پوهنتون هم په یوه خبرپاڼه کې لیکلي چې پوهنتون ته یې هغه مهال پولیس راوبلل کله چې د لاریونونو یو شمیر سمبالوونکو چې له پوهنتون سره یې تړاو نه درلود د لاریون کوونکو محصلانو په ډله کې ننوتي وو.
۶۹ نور اعتراض کوونکي زدکړیالان د ایروزونا ایالت په پوهنتون کې هم نیول شوي.
دفلسطین پلوه محصلانو لاریونونه هغه مهال د امریکا په ټولو پوهنتونونو کې پراخ شول چې پولیسو تېره اونۍ د کولمبیا په پوهنتون کې شاوخوا ۱۰۰ لاریون کوونکي زدهکړیالان ونیول.
