د ایران د بشري حقونو سازمان په یوه راپور کې ویلي، چې د اپریل میاشتې په وروستیو دوو اونیو کې لږ تر لږه ۶۳ کسان د ایران په زندانونو کې اعدام شوي دي. په اعدام شویو کسانو کې لږ تر لږه ۱۶ بلوڅان، شپږ افغانان او درې ښځې شاملې دي.
د دغه راپور له مخې، ایران په تېرو دوو اونیو کې په هرو پنځو ساعتونو کې یو کس اعدام کړی دی.
د ایران د بشري حقونو د سازمان د احصایې د ادارې له خوا راټولې شوې شمېرې ښيي، چې په اپریل میاشت کې د ایران په ۲۴ بېلابېلو زندانونو کې لږ تر لږه ۷۱ بندیان اعدام شوي، چې له دې جملې څخه ۶۳ تنه په وروستیو دوو میاشتو کې په اعدام محکوم شوي ول.
د ۷۱ اعدام شویو بندیانو له جملې څخه ۴۴ تنه د مخدره موادو په تور، ۲۶ تنه د قتل په تور او یو تن د جنسي تیري په تورونو محکوم شوي دي.
د دغه راپور له مخې، د روان کال له پیل څخه د اپریل میاشتې تر پایه، د ۱۴۰۲ کال د وري له ۱۱ څخه تر ۱۱ غويي ۱۴۰۳ پورې، لږ تر لږه ۱۷۱ کسان د ایران په بېلابېلو زندانونو کې اعدام شوي دي.
