د ایران د ځمکني پوځ مشر وايي، د دغه هېواد ځواکونه له افغانستان سره ګډه پوله کې هر ډول ګواښ ته د ځواب ویلو لپاره تیارسي دي. برید جنرال کیومرث حیدري زیاته کړه، شمال ختیځ کې پوله او له افغانستان سره ټوله ګډه پوله د پوځ ځمکنیو ځواکونو ته سپارل شوې چې سرحدي ځواکونه یې هم ملتیا کوي.
د هغه په خبره، چې د ایران د پوځ په مشرۍ د ایران ټول ځمکني ځواکونه سل په سله هر ډول ګواښ سره مقابلې ته تیار او ټولو پولو کې مېشت دي.
ایران له تېر کال راهیسې له افغانستان او پاکستان سره د خپلې پولې د امنیت د لا ټینګښت لپاره د دېوال جوړولو پلان لري.
د ایران د ځمکني پوځ مشر کیومرث حیدري نن په مشهد کې غونډې ته په وینا کې دې دېوال ته په اشاره وویل، چې د دې پولې د بندولو لپاره یې د دېوال کار د ځمکني پوځ د یوې قرارګا په څارنه کار په پوره ځواک سره پیل کړی دی.
نوموړی باوري دی چې دا پوله به ژر او په لنډ وخت کې بنده شي، خو بیا هم وايي چې په مخ کې یې ستونزې او خنډونه شته.
