د غزې تر ټولو لوی الشفا روغتون کې له درېیم ډلهییز قبر څخه د ۴۹ کسانو جسدونه را اېستل شوي دي. دغه ډلهییز قبر چې په ډان ورځپاڼې کې خپور شوی، د الشفا په روغتون کې موندل شوی درېیم ډلهییز قبر او د غزې په روغتونونو کې موندل شوی اووم ډلهییز قبر دی.
دغه مړي وروسته له هغه موندل شوي، چې اسراییل د چهارشنبې په ورځ په قاهره او دوحه کې د اوربند د خبرو په ترڅ کې پر رفح سختې بمبارۍ وکړې.
د اسراییل پوځ د الشفا روغتون څخه د درېیم ډلهییز قبر په اړه لا څه نه دي ویلي.
په خواله رسنیو کې د خپرو شویو تصویرونو له مخې، په الشفاء روغتون کې لږ تر لږه لسګونه جسدونه په تورو پلاستیکي کڅوړو کې لیدل کېږي.
په الشفا کې د بېړنۍ څانګې مشر معتصم صلاح ویلي، چې ډېری مړي ډېر پخواني وو.
تېره میاشت له دغه روغتونه دوه ډلهییز قبرونه راووتل، چې شاوخوا ۳۰ جسدونه په کې ښخ وو.
د غزې د رسنیو دفتر ویلي، په وروستیو اوونیو کې د غزې په ۳ بېلابېلو روغتونونو کې له ۷ ډلهییزو قبرونو څخه تر اوسه ۵۲۰ مړي موندل شوي دي.
په قاهره کې مذاکرات
له بله پلوه د مصر د رسمي رسنیو په وینا، په قاهره کې د ټولو خواوو په ګډون د اوربند په اړه یو وار بیا خبرې اترې پیل شوې.
د حماس یوه جګپوړي چارواکي ویلي، د خبرو دغه پړاو به "پرېکنده" وي.
د حماس یوه چارواکي د نوم نه ښودلو په شرط ای اېف پي ته ویلي، چې دوی پر خپلو غوښتنو ولاړ دي او د خپلو خلکو له حقونو به لاس په سر نه شي.
هغه مخکې خبرداری ورکړی و، چې دا به د اسراییل لپاره "وروستی چانس" وي چې بندیان خوشې کړي.
له بل پلوه اسراییلي ځواکونو د رفح پولې له نیولو وروسته په غزه او رفح کې هوایي او ځمکنیو بریدونو ته دوام ورکړی.
