د طالبانو په واک د افغانستان ستره محکمه وايي، نن دې ډلې په نیمروز او پکتیکا ولایتونو کې لس کسان په عام محضر کې په دورو وهلي دي. دې محکمې د یوې خبرپاڼې په خپرولو سره ویلي، چې له دې لسو کسانو یې ۸ کسان په نیمروز کې او دوه نور یې په پکتیکا کې د غلا په تور په دورو وهل شوي دي.
د خبرپاڼې له مخې، په نیمروز کې دې تورنو ته له ۱۵ تر ۳۰ دورو سربېره د تنفیذي بند سزا هم ورکړل شوې ده.
له دې سره، د پکتیکا ولایت د برمل ولسوالۍ ابتداییه محکمې هم په دوو تورنو د ۳۰ - ۳۰ دورو د حکم په پلې کېدو سره دې دواړو ته د یو کال بند سزا هم ورکړې ده.
په خبرپاڼه کې بیا د تورنو کسانو د هویت په اړه څه نه دي ویل شوي.
د طالبانو سترې محکمې ویلي، په نږدې یوه میاشت کې د غلا، لواطت، زنا، د الکولي مشروباتو د پلور او د بېلابېلو نورو جرمونو په تور شاوخوا ۳۶ کسانو ته په عام محضر کې د تعزیري سزا د حکم د پلې کېدو خبر ورکړی دی.
ډیری دا حکمونه په کابل، پکتیا، پکتیکا، خوست، بدخشان، کندهار، غزني، پنجشیر، نیمروز او جوزجان ولایتونو کې پلي شوي دي.
که څه هم په عام محضر کې د سزا د حکم پلي کېدل له بشري حقونو سرغړونه بلل کیږي، خو طالبان وایي چې دوی په تورنو کسانو شرعي حکم عملي کوي.
د طالبانو له بیا واکمنۍ وروسته د افغانستان په بېلابېلو ولایتونو کې پر ښځو او نارینه وو چې کره شمیر یې تر اوسه روښانه نه دی، په ځلونو په عام محضر کې د قصاص او دورو وهلو حکم عملي شوی دی.
له دې سره، یوناما څو ورځې وړاندې د یوه راپور په خپرولو سره ویلي و، چې د طالبانو له لوري لږ تر لږه هره اونۍ په یوه ولایت کې په عام محضر کې خلکو ته بدني سزا ورکول کېږي.
یوناما په دغه راپور کې ویلي، چې لا هم په افغانستان کې بشري حقونه په بشپړه توګه نه دي تامین شوي.
