د طالبانو د چاپېریال ساتنې د ملي ادارې مشر وایي، چې نړۍوال د چاپېریالي مسایلو په برخه کې له افغانستان سره همکاري نه کوي. حافظ عزیزالرحمان دغه خبرې د دوشنبې په ورځ (د غبرګولي ۲۱مه) د اذربایجان له سفیر الهام محمدوف او د غه سفارت له سلاکار تاریل اسماعیلوف سره په کتنه کې وکړې.
دغې ادارې د یوې خبرپاڼې په خپرولو سره د نوموړي له قوله ویلي، چې افغانستان د اقلیمي بدلون له ناوړه اغېزو څخه زیات اغېزمن شوی، چې په هېواد کې د خطرناکو سېلابونو راوتل یو له عمده لاملونو څخه دي.
د طالبانو د چاپېریال ساتنې د ملي ادارې مشر زیاتوي؛ چاپېریال چې یوه مهمه او نړۍواله موضوع ده او دغه اداره اوسمهال د ۱۶نړۍوالو چاپېریالي کنوانسیونونو غړیتوب لري.
د ښاغلي عزیزالرحمن په خبره:"موږ د نړۍوالو چاپېریالي کنوانسیونو تعهداتو ته ژمن او هیله مند یو، چې نړۍوال هم له افغانستان سره تعامل وکړي."
هغه د اذربایجان له سفیر څخه وغوښتل څو (د سي او پي) کنفرانس چې ټاکل شوې سږکال په دې هېواد کې ترسره شي د افغانستان د پلاوي د ګډون لپاره هڅې وکړي.
نوموړی وایي، چې طالبان غواړي له اذربایجان سره د چاپېریالي موضوعاتو، د تېکنالوژیو او تجاربو د انتقال او ظرفیت لوړونې په برخه کې ګډې همکارۍ ولري.
له دې سره، د طالبانو د چاپېریال ساتنې ملي ادارې مسلکي او پالیسي معین زین العابدین عابد وایي، چې پر افغانستان ددغې ډلې له واکمنۍ وروسته بهرني چاپېریالي موضوعات د سیاسي ملحوظاتو له امله ځنډیدلي دي.
اخوا د اذربایجان سفیر بیا په دې کتنه کې په بېلابېلو برخو کې د دواړو هېوادو د اړیکو په پراخوالي ټینګار کړی دی.
الهام محمدوف ویلي، چې په (سي او پي) غونډه کې به د افغانستان د پلاوي د ګډون لپاره هلې ځلې وکړي.
دا په داسې حال کې ده، چې څو ورځې وړاندې د طالبانو د ریاست الوزرا اداري مرستیال عبدالسلام حنفي د چاپیریال ساتنې د نړیوالې ورځې په مناسبت غونډه کې ویلي، چې افغانستان د نورو هېوادونو د ګلتوني ګاز د تولید له امله زیانمن شوی دی.
نوموړي دا هم ویلی و، چې چاپېریال د نړۍ د صنعتي قدرتونو له حده زیاتې ګټې اخیستنې له امله تر بل هر وخته له زیات ګواښ او نابودۍ سره مخ دی.
وچ او نیمه وچ اقلیم، پر طبیعي زېرمو ولاړ اقتصاد، دوامداره وچکالي، د عامه پوهاوي کچې ټيټوالی، د اقلیمي بدلون له امله رامنځته شوې طبیعي پېښې، د جګړو پر مهال د هر ډول ممنوعه وسلو کارول او د نړۍوالو سازمانونو د کافي همکارۍ نشتون د افغانستان د چاپېریال د زیانمنېدو لاملونه دي.
