د پخواني ولسمشر حامد کرزي د دفتر رییس وایيو افغانستان کې سترې جیوپولیټیک سیالۍ د سړې جګړې په شکل روانې دي. کریم خرم زیاتوي، «که نړۍ طالبان په رسمیت و نه پېژني، نړیوالو سازمانونو کې حضور و نه لري او په ترهګریزو ګروپونو کې دوامدار پاتې شي، دا سړه جګړه به په نیابتي جګړو بدله شي.»
ښاغلي خرم نن په خپل اېکس کې د نیابتي جګړو په اړه د اندېښنې په څرګندولو سره ویلي، چې په افغانستان کې د دغو احتمالي جګړو مخه د اصلاحاتو په راوستو او د قانون په حاکمیت سره نیول کېدلی شي.
نوموړي د اوکراین او غزې جګړو ته په اشاره زیاته کړې: «ښایي سبا ته د چین سویل او یا تایوان به هم د جګړو شاهد وي.»
د افغان سیاستوالو دغه اندېښنې په داسې حال کې زیاتېږي، چې پر افغانستان د طالبانو له واکمنۍ د نږدې دریو کلونو په تېرېدو تر اوسه هم د دغې ډلې حکومت د نړۍ هیڅ یوه هېواد په رسمیت نه دی پېژندلی.
که څه هم طالبان د سیمې هېوادونو ته سفرونه کوي، خو د افغانستان اړوند ځینو ناستو کې دغې ډلې ته بلنه نه ورکول کیږي او که بلنه هم ورکړل شي طالبان یې د خپلو مخالفو ډلو د ګډون له امله ردوي.
له دې سره، تېره میاشت د اور اسیا ټایمز ورځپاڼې د یوه راپور په خپرولو سره وویل، چې د افغانستان له خاورې څخه کابو ۲۳ ترهګرې ډلې د نورو هېوادونو پر ضد فعالیتونه کوي.
په راپور کې د ټيټيپي، داعش خراسان، القاعده، جېش العدل، د ختیځ ترکستان اسلامي غورځنګ، القاعدې، د ازبکستان اسلامي غورځنګ، د تاجکستان د طالبانو د تحریک او د بلوڅانو د ډلو نومونه یاد شوي، چې بیا هر یوه یې بېلابېلې نورې څانګې هم لري.
په راپور کې دغه راز راغلي:« د القاعدې اصلي مشران په افغانستان کې دي او د خپلې ځواکمنتیا لپاره په هڅو بوخت دي.»
د راپورونو له مخې، القاعده ډلې د افغانستان په روزګان، غزني، لغمان او پروان ولایتونو کې اته نوي کمپونه هم جوړ کړي دي.
که څه هم طالبان په افغانستان کې اوسمهال د ټولو وسلهوالو ډلو خبره ردوي؛ خو د امریکا په ګډون د سیمې ګڼ هېوادونه بیا د دغو ډلو له حضوره اندېښمن دي.
