ظاهر اغبر: تاجکستان کې هغو افغان ماشومانو ته د زدهکړو اسانتیا برابروم چې مالي توان نه لري
په تاجکستان کې د افغانستان د مخکیني جمهوري حکومت سفیر ظاهر اغبر وایي: «هغو زدهکوونکو ته د وړیا زدهکړو اسانتیاوې برابروم چې مالي توان نه لري او خپلو زدهکړو ته دوام ورکړي.» ورته مهال د طالبانو له لوري تر شپږم ټولګي پورته د نجونو پر زدهکړو د بندیز زر ورځې بشپړې شوې.
په تاجکستان کې د افغانستان د مخکیني جمهوري حکومت سفیر ظاهر اغبر نن پنج شنبه د (غبرګولي ۲۴مه) په خپله ایکس پاڼه لیکلي چې په تاجکستان کې د مېشتو افغان کډوالو هغو زدهکوونکو ته د وړیا زدهکړو اسانتیاوې برابروي چې مالي توان نه لري او غواړي خپلو زده کړو ته دوام ورکړي.
دا په داسې حال کې ده چې په افغانستان کې واک ته د طالبانو له رسېدو وروسته دغې ډلې تر شپږم ټولګي پورته د نجونو پر زدهکړو د بندیز ۱۰۰۰ ورځې پوره شوې.
دغه افغان ډيپلوماټ وايي، د تاجکستان په پلازمېنه دوشنبه کې یې د افغانانو هغه ښوونځی چې د اقتصادي ستونزو له امله د تړل کېدو له ګواښ سره مخ و د سفارت مرکزي دفتر ته لیږدولی او اوس هم فعالیت کوي.
هغه وايي، د دغه ښوونځي د زدهکړو بهیر د لا ښه والي لپاره یې د ښوونکو د زیاتولو اعلان کړی و چې یو لوی شمېر افغان ښوونکي ورغلي او ښوونې او روزنې په برخه کې یې د مرستې چمتووالی ښودلی.
ښاغلي اغبر په خپله ایکس پاڼه په دوشنبه کې د افغان سفارت په انګړ کې د هغو افغان ښوونکو انځورونه خپاره کړي چې د وړیا ښوونې لپاره یې چمتووالی ښودلی.
یو شمېر بهر مېشتو افغان فعالان پر افغان نجونو د زدهکړو د بندیز د ۱۰۰۰ ورځو له پوره کېدو سره د (اقراء) په نامه کمپاین پیل کړی او له طالبانو یې غوښتي چې د افغان نجونو لپاره دې د ښوونځیو دروازې پرانیزي.
