ملا حسن اخند له خلکو وغوښتل چې د طالبانو د رژیم ملاتړ وکړي
د طالبانو رییس الوزرا د لوی اختر په مناسبت په یوه پیغام کې له خلکو غوښتي چې د دغې ډلې له نظام څخه په کلکه ملاتړ وکړي.
ملا حسن اخند د شنبې په ورځ په خپل اختریز پیغام کې ویلي، چې د طالبانو د رژیم د دوام او غښتلتیا لپاره د خلکو ملاتړ خورا مهم دی.
د طالبانو ارګ د شنبې په ورځ د د دغې ډلې د رییس الوزرا پیغام خپور کړ. ملا حسن اخند په دغه پیغام کې وویل: “ملت ته زما پیغام دا دی چې د خپل اسلامي نظام ټینګ ملاتړ وکړي او له چارواکو سره په ښو کارونو کې همکاري وکړي، ځکه د نظام په ټینګښت کې د ولس همکاري ډېره اړینه ده.”
هغه ادعا وکړه چې د افغانستان خلک اوس کولای شي د امنیت له امله ټول هیواد ته تګ راتګ وکړي.
طالبانو د جمهوریت د نسکوریدو پرمهال په پوځي ځواک کابو درې کاله مخکې کابل ونیوه خو لا کورنی مشروعیت او نړیوال رسمیت نه لري.
طالبانو د افغانستان د واکه تر لاسه کولو وروسته عمومي عفوه اعلان کړه، خو د ملګرو ملتونو او د بشري حقونو د سازمانونو د راپورونو له مخې دغې ډلې په ډېرو مواردو کې خپل مخالفین نیولي، بندیان کړي، شکنجه کړي او وژلي دي.
ملاحسن له طالب چارواکو وغوښتل چې خلکو ته د خدمتونو په وړاندې کولو کې غفلت ونکړي.
دا په داسې حال کې ده چې د طالبانو له واکمنۍ سره په ټولنه کې بې روزګاري او اقتصادي بېوزلي زیاته شوې او طالبانو د سختو بندیزونو په لګولو سره ښځې له عامه ډګره ایستلي او له اساسي حقونو یې بې برخې کړي دي.
دا پیغام د طالبانو د رییس الوزرا له ادرس څخه خپریږي چې د مارچ له میاشتې راهیسې یې هیڅ ویډيو یا عکس کې نه دی لیدل شوی.
په کابل کې حکومتي غونډې په عمده توګه د ملاحسن د مرستیالانو له خوا پر مخ یوړل کیږي.
