د ګلبدین حکمتیار زوی د طالبانو له نوم اخیستو پرته وایي، چې با شعور او روڼ اندي کسان د ښځو د حقونو او د د دوی تعلیم د مخالفانو ملاتړ نه کوي. حبیب الرحمان حکمتیار زیاتوي، د اسلامي نړۍ رښتیني علماء او لوستي مخور شخصیتونه داسې حالت نه غواړي چې ملت یې د مشورې او پرېکړې حق ونه لري.
حبیب الرحمان حکمتیار نن په خپل اېکس کې لیکلي، چې دغه کسان به نه نن او نه هم په راتلونکو کلونو کې د ښځو د حقونو د مخالفاو ملاتړ وکړي.
نوموړي دغه راز طالبانو ته په خطاب کې لیکلي، چې باید له راتلونکي وېره ولري، ځکه چې د ولس ذهنیت د پوهو یا نخبه خلکو لخوا جوړیږي.
ښاغلي حکمتیار په غیر مستقیمه طالبانو ته ویلي؛ یوه ورځ به پوه شي چې د ولس ذهنیت به تل د دوی مخالف وي.
نوموړی دغه خبرې په داسې حال کې کوي، چې څو ورځې مخکې د طالبانو د لوړو زدکړو وزارت ویاند د «شیخ عبدالعلي دیوبندي» فتوا په خپل اېکس کې خپره کړه، چې وایي ان په کور کې د نجونو زدکړې ناروا دي.
ضیاالله هاشمي د دغه مړه مفتي د غږ خپرولو سره ویلي دي، د نجونو زدکړې د فحشا د ترویج لامل کیږي، یوه مهمه فتوا ده.
پر افغانستان د طالبانو له بیا واکمنېدو وروسته دغې ډلې له شپږم ټولګي پورته د نجونو ښوونځي وتړل او پوهنتونونو ته یې هم د نجونو د تګ مخه ونیوله.
دغې ډلې په دولتي ادارو کې ښځې له کار کولو هم منع کړې دي او د څه باندې پنځوسو فرمانونو په صادرولو سره یې پر ښځو پراخ بندیزونه لګولي دي.
په تېرو نږدې درېیو کلونو کې نړیوالې ټولنې په ځلونو له طالبانو غوښتي، چې د نجونو ښوونځي بېرته پرانیزي او پر ښځو لګیدلي بندیزونه لرې کړي، خو دغه ډله وایي چې دا د دوی کورنۍ مسله ده او هیچا ته په خپلو چارو کې د لاسوهنې اجازه نه ورکوي،
د ښځو پر وړاندې د طالبانو د محدودیتونو له امله د بشري حقونو سازمانونه وايي، چې دغې ډلې جنسیتي توپیر رامنځته کړی او ښځې یې له ټولنې ګوښه کړي دي.
