د ملګرو ملتونو د بشري حقونو په شورا کې د روسیې استازي د سه شنبې په ورځ وویل چې له طالبانو سره له خبرو پرته په افغانستان کې دایمي سوله او ټیکاو ناشونی دی، په ځانګړې توګه د بشري حقونو په برخه کې. ایوګیني ویکتوروف په افغانستان کې د یوه ټولګډونه حکومت پر جوړولو ټینګار وکړ.
د روسیې استازي د سه شنبې په ورځ د دغې شورا په ۵۶مه غونډه کې چې افغانستان ته ځانګړې شوې وه وویل، مسکو د پوهنې او کارموندنې په برخه کې د افغان ښځو او نجونو د وضعیت په ګډون اقتصادي وضعیت او بشري حقونه له نږدې څاري.
ویکتوروف یو ځلې بیا په افغانستان کې د یوه ټولګډونه حکومت پر جوړېدو ټینګار وکړ او ویې ویل: «یوه ډېره مهمه مسله په افغانستان کې د دغه هېواد د ټولو قومونو او لږکیو د استازو په ګډون په بشپړ ډول ټولګډونه حکومت جوړول دي.»
نوموړي په دغې ناسته کې د افغانستان روان وضعیت او له دغه هېواده د نړیوالو ځواکونو د «نا مسوولانه وتلو» پایله وګڼله او ویې ویل، چې طالبانو ته افغانستان له ډېرو ستونزو ډک سپارل شوی.
ویکتوروف زیاته کړه چې پر نړیوالو مرستو د افغانستان متکي کېدو د دغه هېواد اقتصادي وضعیت خراب کړی دی.
هغه دا هم وویل چې پر طالبانو د نړیوالو بندیزونو افغانستان بشري ناورین ته ډېر نږدې کړی دی.
