د روسیې ولسمشر شمالي کوریا ته د خپل سفر له پای ته رسولو وروسته، د پنجشنبې په ورځ د غبرګولي په ۳۱ مه نېټه ویتنام ته ورسید. په پام کې ده چې ولادیمیر پوتین د ویتنام په پلازمینه هانوی کې د دغه هیواد له کمونیسټو مشرانو سره خبرې اترې وکړي.
د ویتنام د لومړي وزیر مرستیال تران هونګ او د دغه هېواد یو شمېر جګپوړو ډیپلوماټانو د هانوي په هوايي ډګر کې د روسیې د ولسمشر هرکلی وکړ.
د ویتنام د واکمن کمونسټ ګوند اړوند د «نهان ډان» ورځپاڼې د چهارشنبې په ورځ د ولادیمیر پوتین یوه مقاله خپره کړه چې په کې د روسیې ولسمشر د اوکراین د جګړې په اړه د ویتنام د «متوازن دریځ» ستاینه کړې وه.
ویتنام چې په رسمي توګه یې له ځواکمنو هېوادونو سره په خپلو اړیکو کې د «بې طرفۍ» پالیسي غوره کړې، تر اوسه پورې یې پر اوکراین د روسیې د برید له غندلو ډډه کړې ده. ورته مهال دا هیواد وتوانید چې په احتیاط سره د متحده ایالاتو او اروپایي اتحادیې یو متحد پاتې شي.
پوتین شمالي کوریا ته له دوه ورځني سفر وروسته ویتنام ته رسېدلی دی.
هغه د چهارشنبې په ورځ د شمالي کوریا له مشر کیم جونګ اون سره ستراتیژیک تړون لاسلیک کړ.
