د فرانسې خبري اژانس په یوه راپور کې راغلي، چې په مکه کې د حج په مراسمو کې د تودوخې له امله د مړو شویو حاجیانو شمېر ۹۲۲ تنو ته رسېدلی دی. د راپور له مخې، د ګرمۍ له امله مړه شوي ۶۰۰ حاجیان مصریان دي.
د فرانسې خبري اژانس په راپور کې راغلي، نور مړه شوي حاجیان د اردن، اندونیزیا، ایران، سینیګال، تونس او عراق اوسېدونکي دي.
د فرانسې خبري اژانس په خبره، تر دې دمه ۲۰ تنه اردني حاجیان لادرکه دي چې په اړه یې پلټنه روانه ده.
د پاکستانۍ رسنیو د راپورونو له مخې، په دغو مړو شویو حاجیانو کې ۳۵ پاکستانیان هم شامل دي.
د دغه اژانس د خبر له مخې، سږ کال ۱.۸ مېلیونه کسانو داسې مهال د حج فریضه ادا کړې، چې په مکه مکرمه کې د تودوخې درجه ۵۱.۸ درجې سانتي ګراد ته لوړه شوې وه.
که څه هم سعودي عربستان د دغو مړو شویو کسانو شمېرې نه دي خپرې کړې؛ خو ویلي یې دي، چې ۲۷۰۰ حاجیان ګرمۍ وهلي دي.
سعودي چارواکو د حج مراسمو لپاره د ګرمۍ تر ټولو سترې ننګونې په پام کې نیولو سره احتیاطي تدابیر هم نیولي دي.
تر دې وړاندې د سعودي د هوا پېژندنې ادارې سږ کال د حج مراسمو پر مهال د سختې ګرمۍ وړاندوینه کړې وه او د سعودي د حج او عمرې وزارت د حاجیانو لپاره لازمې تابیاوې هم نیولې وې.
