د طالبانو د ارشاد حج او اوقافو وزارت وایي، چې په مکه مکرمه کې د حج مناسک په ښه توګه پای ته رسېدلي او ډېر ژر به د افغان حاجیانو د راتګ لړۍ پیل کړي. دغه وزارت وايي، د ۳۰ زرو حاجیانو د بېرته راتګ لړۍ به له مکې مکرمې څخه پیل کړي.
د طالبانو حج او اوقاف وزارت نن پنجشنبه د (غبرګولي ۳۱مه) په ایکس پاڼه د دغه وزرات د وزیر نورمحمد ثاقب یو ویډیویي کليپ خپور کړی، هغه ويلي چې د هغو ۳۰ زرو حاجیانو له ډلې چې ځينې هغه یې له کابله په لومړیو پراوزونو کې تللي وو، د هغوی د راتلو لړۍ به ژر پیل کړي.دغه وزیر وايي، هغه افغان حاجیان چې تر اوسه پورې مدینې منورې ته نه دي تللي، هغوی به مدینې منورې ته استوي او له هغه وروسته به یې کابل ته د راتلو تابیا کوي.نوموړي زیاته کړې، د افغان حاجیانو له ډلې ځینې هغه یې د حج مراسمو پر مهال نادرکه شوي وو چې تر پلټنو وروسته یې موندلي او د هغوی ستونزو ته رسېدلي دي.سږ ۱۴۰۳ کال د طالبانو د ډلې د قاضی القضات په ګډون د حج و اوقافو وزیر، کورنیو چارو وزیر، د رییس الوزرا سیاسي مرستیال، د استخباراتو عمومي مشر او یو شمېر نور طالب مشران سعودي عربستان ته د حج فریضې د ادا کولو لپاره تللي دي چې په سعودي عربستان کې یې د یکشنبې په ورځ اختر ونمانځه او په افغانستان کې بیا د طالبانو د مشر په ګډون نورو طالبانو د دوشنبې په ورځ لوی اختر ونمانځه.
