یونیسف: افغانستان کې شاوخوا ۹ لکه ماشومان له وژونکې خوارځواکۍ سره مخ دي
د ملګرو ملتونو د ماشومانو صندوق په افغانستان کې د ماشومانو پر خوراکي خوندیتوب د اقلیم د بدلون د اغېز په اړه خبرداری ورکړی. یونیسف اټکل کوي، چې دا مهال په افغانستان کې تر اته لکه ۷۵ زرو زیات ماشومان چې عمرونه یې له پنځو کلونو کم دي په وژونکې خوارځواکۍ اخته دي.
د ملګرو ملتونو دغه مرستندویه سازمان په یوه راپور کې لیکلي، چې په اپریل میاشت کې د سختو بارانونو له امله د سېلاب ځپلو سیمو اوسېدونکو خپل هر څه له لاسه ورکړي دي.
یونېسف زیاتوي، چې د خوړو او د څښاک د پاکو اوبو نشتوالی هغه څه دي، چې ماشومان ناروغوي او بیا دغه ډېری ناروغان روغتیايي مرکزونو ته لاسرسی نه لري.
افغانستان د اقلیم د بدلون د اغېز په وړاندې اووم ډیر زیان منونکی هېواد دی، په داسې حال کې چې دا هېواد په نړۍ کې د ککړتیا تر ټولو ټیټه کچه لري.
ملګري ملتونه وايي، د افغانستان ۸۰ سلنه وګړي په کرڼې متکي دي، خو پرله پسې طبیعي پېښې د کورنیو په تېره بیا په کلیوالو سیمو کې پر تغذیه مستقیمه اغېزه لري.
یونېسف په خپل راپور کې وايي، چې د وروستیو څو کلونو له زلزلې او وچکالۍ وروسته ویجاړوونکو سېلابونو په افغانستان کې د خوراکي توکو د سرچینو له منځه تللو ګواښ رامنځ ته کړی دي.
د یونېسف په وینا په تیرو څو اونیو کې د افغانستان په لویدیځو او شمالي ولایتونو کې د ناڅاپه سېلابونو له امله څه باندې ۷۵۰۰ کورونه ویجاړ شوي او ۵۰۰۰ کورنۍ بې ځایه شوي دي.
همدارنګه د ماشومانو د ساتنې د دې موسسې د راپور له مخې، په بغلان کې وروستیو سېلابونو ۳۰۰۰ کورونه نړولی او ۲۲۰ نور یې ټپیان کړی او ۱۵۰ تنه یې وژلي دي.