د ترکیې په استانبول کې د طالبانو او پاکستان ترمنځ د خبرو درېیمه ورځ وروستیو ساعتونو ته رسېدلې، خو لا تراوسه د دواړو لوریو ترمنځ هېڅ هوکړه نهده شوې. د پاکستان رسنیو هم د رسمي سرچینو له قوله راپور ورکړی، چې طالب پلاوي له اسلاماباد سره د هر ډول هوکړې له لاسلیک کولو ډډه کوي.
طالبانو لا تراوسه په استانبول کې د مذاکراتو د پرمختګ د څرنګوالي او یا هم پر وړاندې یې د ستونزو په تړاو څه جزییات نه دي ورکړي او یوازې یې دومره ویلي، چې د مذاکراتو فضا دوستانه ده.
د اکسپرېس ټربیون ورځپاڼې د راپور لهمخې، د طالب او پاکستان پلاویو ترمنځ له اوږدو خبرو سره سره لا تراوسه هم په دغو مذاکراتو کې د پرمختګ څه نښې نښانې نه لیدل کېږي. د دغې ورځپاڼې په وینا، طالبان پر «نه انعطاف منونکي» دریځونو ولاړ دي او ان چمتو نهدي چې هوکړې کتبي بڼې ته واړول شي.
دغه مذاکرات د ترکیې په کوربتوب او د قطر په منځګړیتوب په استانبول کې روان دي.
یادې ورځپاڼې زیاته کړې، دغه پړاو مذاکرات له دوو ورځو اوږدو خبرو وروسته لا هم له مشخصې پایلې پرته دوام لري.
د دوشبنې په ورځ (د لړم ۵مه) افغان او پاکستاني سرچینو وویل، په دغو مذاکراتو کې د طالبانو سخت دریځ د استانبول خبرو بهیر له ګواښ سره مخ کړی دی. طالب پلاوی په افغانستان کې د ټيټيپي حضور او له افغان خاورې یې د استفادې مساله نه مني. دا په داسې حال کې ده، چې د دغو خبرو یو له اصلي موضوعګانو له افغان خاورې د ټيټيپي استفاده او پر پاکستاني ځواکونو بریدونه دي.
طالبانو په وار وار ویلي، چې ټيټيپي په افغانستان کې نشته او دغه ډله په پاکستان کې ده او هلته پر خپلو فعالیتونو بوخته ده.
تر دې مخکې پاکستاني چارواکو ویلي و، چې د اسلاماباد دریځ روښانه دی، «له ترهګرو ډلو د طالبانو ملاتړ» باید ودرول شي او افغان خاوره باید د پاکستان پر ضد ونهکارول شي.
له دې سره سم، ترکیه او قطر چې د دواړو لوریو ترمنځ منځنګړي دي د دغو خبرو د دوام هڅې کوي. اکسپرېس ټربیون ویلي، طالبانو له امریکا سره هم په هوکړه کې ژمنه کړې وه، چې افغان خاوره به د بل هېڅ هېواد پر ضد ونه کارول شي او په وینا یې اوس پاکستان غواړي طالبان پر دغې کړې ژمنې عمل وکړي.
د طالبانو او پاکستان ترمنځ د خبرو دویم پړاو د دوشنبې په ورځ (د لړم ۵مه) د درېیمې ورځې لپاره په استانبول کې دوام وموند.
د دغو مذاکراتو لومړی پړاو د تلې پر ۲۶مه په دوحه کې د طالبانو او پاکستان د دفاع وزیرانو او د استخباراتو د رییسانو ترمنځ ترسره شو او په پایله کې یې یوه ابتدايي هوکړه هم لاسلیک شوه.
