په افغانستان کې د ښځو لپاره د ملګرو ملتونو د دفتر رييسې مېرمن سوسن د بامیان ولایت لپاره د طالبانو له والي سره په کتنه کې دغه ولایت کې په اقتصادي او سیمهییزو چارو کې د ښځو د ظرفیت لوړونې او د پراختیايي پروګرامونو پر دوام او همداراز په دې برخه کې د همکاریو پر لا تقویت ټينګار وکړ.
د بامیان ولایت د رسنیو دفتر د دوشنبې په ورځ (د لړم ۵مه) د یوې خبرپاڼې په خپرولو سره ویلي، مېرمن سوسن په دې کتنه کې په ډاګه کړه، چې په بامیان کې د ښځو سوداګریزې چارې د دولتي بنسټونو دومداره ملاتړ ته هم اړتیا لري.
په دې کتنه کې د بامیان ولایت د طالبانو والي عبدالله سرحدي وویل، چې په بامیان کې د اسلامي اصولو په چوکاټ او خوندي چاپېریال کې د ښځو لپاره د اقتصادي فعالیتونو زمینه برابره شوې ده. نوموړي د ښځینه سوداګرو د اړتیاوو په اشاره سره د ښځو د لاسي صنایعو او سیمهییزو تولیداتو له بازارګوټو د ملاتړ او همداراز په ملي او نړیوالو بازارونو کې د هغوی لپاره د بازار موندنې غوښتنه وکړه.
عبدالله سرحدي همداراز د ملګرو ملتونو له دغه پلاوي د بند امیر ملي پارک د بیارغونې او پراختیا په برخو کې د همکاریو غوښتنه وکړه او د دغه پارک په شاوخوا کې د زرغونو سیمو، مناسبو دوکانونو او د سیلانیانو د اوسېدنې لپاره د معیاري ځایونو جوړېدل د یاد پارک اساسي اړتیاوې په ګوته کړې.
نوموړي همداراز د دغه ولایت په مرکز کې د څښاک پاکو اوبو کمښت ته په نغوتې سره له ملګرو ملتونو وغوښتل، چې ښاري او دولتي ادارو ته له اهنګرانو درې د اوبو د لېږد په برخه کې هم ورسره همکاري وکړي.
په افغانستان کې د ښځو لپاره د ملګرو ملتونو د دفتر رييسې مېرمن سوسن هم ژمنه وکړه، چې دغه غوښتنې به له نورو تمویل کوونکو نړۍوالو سازمانونو سره شریک کړي او یو ځل بیا یې په ډاګه کړه، چې ملګري ملتونه د ښځو د سوداګریزو چارو ودې او د ښځو د اقتصادي ځواکمنتیا کچې لوړولو ته ژمن دي.
د بامیان والي په داسې حال کې د بند امیر د بیارغونې او پراختیا غوښتنه کړې، چې طالبان د بند امیر په ګډون پارکونو ته د ښځو پر تګ بندیز لګولی او د بامیان د رسنیو دفتر پر خپله اېکس پاڼه په خپاره شوي عکس کې د مېرمن سوسن تصویر هم نه دی راوستی.
