د سومالیا د پلازمینې موګادیشو په مرکزي زندان کې د امنیتي ځواکونو او بندیانو ترمنځ په نښته کې پنځه بندیان او درې سرتیري وژل شوي دي. د سومالیا د ګارد قول اردو ویاند عبدیقاني خلف وايي، چې په دغو ډزو کې ۱۸ بندیان او درې پوځیان ټپیان شوي هم دي.
د سوماليا ملي تلويزيون د سې شنبې په ورځ د جنګاښ په ۲۳مه نېټه د سوماليا د پوځ د ګارد قول اردو د وياند عبدیقاني خلف په حواله خبر ورکړ، چې جګړه هغه مهال رامنځته شوه چې وسله والو بنديانو چې د تيښتې هڅه يې کوله د زندان پر ساتونکو بريد وکړ.
عبدیقاني خلف وویل: "دغه بندیان د الشباب ډلې غړي وو، چې د القاعدې ډلې پورې اړوند وو او په اعدام محکوم شوي وو."
ښاغلي خلف زیاته کړه، چې وروسته له هغه چې وسلې او لاسي بمونه د بندیانو لاس ته ورغلل، د عملیاتو په ترڅ کې وضعیت کنټرول شو.
د هغه په وينا؛ هېڅوک په تېښته بريالي نه شول.
