له ننګرهار څخه یو شمېر مدني فعالانو افغانستان انټرنشنل - پښتو ته ویلي، چې د طوفان ځپلو لپاره یې یوه مشترکه کمېټه جوړه کړې وه، چې په جلال اباد ښار کې مرستې راټولې کړي؛ خو طالبانو یې مخه نیولې او ګواښلي یې دي، چې رسنیو ته په دې اړه څه ونه وايي.
دوه ورځې وړاندې د جلال اباد ښار یو شمېر مدني فعالانو د طالبانو د اطلاعاتو او کلتور ریاست په همغږۍ یوه ځانګړې کمېټه جوړه کړې وه، چې د طوفان ځپلو لپاره مرستې راټولې کړي؛ خو نن له څو ساعته مرستو راټولو وروسته ورته طالبانو ویلي، چې حق نه لري مرستې راټولې کړي.
د جلال اباد ښار یو مدني فعال افغانستان انټرنشنل - پښتو ته وویل، چې لومړی ورسره طالبانو منلې وه، چې د جلال اباد ښار د عیدګاه په جومات کې دې خېمه ووهي او مرستې دې راټولې کړي؛ خو وروسته یې د دوی د خېمې مخالفت کړی دی.
هغه زیاته کړه: "کار مو شروع کړ، د خلکو علاقه زیاته وه؛ مګر طالبان راغلل ویل یې چې تاسو حق نه لرئ چې مرستې راټولې کړئ".
د یوې خیریه ټولنې غړي د نوم د نه ښودلو په شرط وویل، چې دا مهال په سره رود، بهسودو او یو شمېر نورو ولسوالیو کې طوفان او سېلاب ځپلي له سختو ستونزو سره مخ دي؛ خو طالبانو کومه محسوسه مرسته نه ده کړې.
بل خوا په افغانستان کې د ملګرو ملتونو د بشري مرستو د همغږۍ اداره (اوچا) وايي، د وروستیو سېلابونو له امله ۷۳۴ کورنۍ بېړنیو مرستو ته ارتیا لري.
اوچا نن ویلي، په بدخشان، کونړ، لغمان، ننګرهار او نورستان کې د دې سېلابونو له امله ۴۰ تنه مړه شوي، ۲۵۱ ټپيان شوي او ۵۷۳ کورونه ویجاړ شوي دي.
