د امریکا د استخباراتو مشرې د ولسي جرګې د څار کمېټې ته په وینا کې ومنله چې، اداره یې د امریکا د ولسمشرۍ پر نوماند ټرمپ د ډزو په مخنیوي کې پاتې راغلې. خو، کیمبرلي چیټل د دواړو ګوندونو غوښتنې رد کړې چې د هغې استعفا یې غوښتې وه.
د دوشنبې په ورځ د زمري په لومړۍ نېټه د امریکا د استخباراتو مشرې، د دغه هېواد ولسي جرګې د څار کمېټې ته په خپله وینا کې وویل: «موږ ماتې وخوړه. د ډونالډ ټرمپ د وژنې هڅه په لسیزو کې د استخباراتو تر ټولو مهمه عملیاتي ناکامي ده.»
د دې کمېټې جمهوري غوښتونکو او ډیموکراتو وکیلانو له کیمبرلي چیټل څخه وغوښتل چې استعفا ورکړي، خو هغې له داسې غوښتنو سره مخالفت وکړ.
اغلې چیټل وویل: «زه فکر کوم چې همدا اوس د استخباراتو د اداره کولو لپاره تر ټولو غښتلې او وړه یم.»
هغې د جمهوري غوښتونکو هغه ادعاوې رد کړې چې ګواکې استخباراتو د ټرمپ د ساتنې لپاره کافي سرچینې نه دي ځانګړې کړې، او ویې ویل چې د پخواني ولسمشر امنیت له ډزو مخکې زیات نیول شوی و.
کیمبرلي چیټل وویل: «د پخواني ولسمشر لپاره د امنیت کچه د کمپاین څخه ډیره مخکې لوړه شوې وه او د ګواښونو په رامینځته کیدو سره په دوامداره توګه نوره پیاوړې کیږي.»
د دوشنبې په ورځ غونډه د کانګرس د اوریدنې لومړی پړاو و، چې د ډونالډ ټرمپ د ډزو په اړه څېړنې وکړي. ټاکل شوې د (ایف بي ای) مشر کریسټوفر ری د چهارشنبې په ورځ د ولسي جرګې قضایي کمیټې ته حاضر شي.
د امریکا د استازو جرګې قضایي کمیټې تیره اونۍ وویل، داسې اسناد لري چې استخبارات د ټاکنیزو منډو ترړو او د ناټو سرمشریزې جوړېدو له امله د بشري ځواک د کمښت له امله د ټرمپ د کمپاین لاریونونو د ساتنې لپاره چمتو نه دي.
توماس کروکس د جولای په ۱۳مه په پنسلوانیا کې د ټاکنیز کمپاین په غونډه کې پر ټرمپ ډزې وکړې چې د ډونلډ ټرمپ یې په غوږ ټپي کړ. دغه شل کلن مشکوک کس، چې د دغه کار انګيزه يې لا نه ده معلومه، د پېښې په ځاى کې د امنيتي ځواکونو له خوا ووژل شو.
