د بریټانیا د کورنیو چارو وزیرې ویلي، د هغو زرګونو کډوالو غوښتنلیکونه به وڅېړل شي چې د شړلو په درشل کې دي. ایوټ کوپر ژمنه وکړه، په هوټلونو کې به د هغو کډوالو د اوسېدلو بهیر ودروي چې ډېر لګښت پرې راځي.
مېرمن کوپر زیاته کړه، چې د ناقانونه کډوالو د منلو لپاره به د منعه کولو قانون هم له منځه یوسي.
د کارګر ګوند د حکومت دغې غړې د بریټانیا پارلمان ته وویل، چې په دې برخه کې به د کډوالۍ د قانون یوه ماده له منځه یوسي.
مېرمن کوپر دا رنګه وویل، چې د محافظه کار ګوند حکومت غوښتل روانډا ته د ناقانونه کډوالو د اېستلو په کار کې ۱۳ مېلیارډه ډالر لګول، چې دغه تګلاره واک ته د کارګر ګوند په لومړۍ ورځ د کېیر سټارمر لهخوا لغوه شوه.
هغې زیاته کړه، پخواني حکومت روانډا ته د کډوالو د اېستلو په کار کې مخکې له دې چې د کډوالو د اېستلو لړۍ پیل شي نږدې یو ملیارډ ډالره بودجه لګولې ده.
مېرمن کوپر وویل: «۷۰۰مېلیونه پونډه (۹۰۳مېلیون او ۶۹۲ زره ډالره) د چارتر الوتنو، چې هیڅکله یې هم الوتنه و نه کړه، د روانډا حکومت او د کارمنانو د تنخواو لپاره لګول شوي دي.»
د بریټانیا د کورنیو چارو نوې وزیرې د ناقانونه کډوالو د اېستلو لپاره دومره لګښت «د خلکو د مالیاتو بې ځایه لګول هېښونکي» وبلل.
د محافظه کار ګوند په مشرۍ د بریټانیا حکومت په ۲۰۲۲ زېږدیز کال کې روانډا ته د ناقانونه کډوالو د اېستلو تګلاره تصویب کړه، چې په دې توګه د مانش کانال له لارې بریټانیا ته د ناقانونه کډوالو مخه ونیسي.
د حکومت دغه تګلاره د محکمې له حکم وروسته وځنډول شوه.
محکمې ویلي و، چې د کډوالو لپاره روانډا امن هېواد نه دی.
