د شپږېزي لیګ درېیمه سیالۍ کې د رحمت شاه زرمتي په لوبډلمشرۍ د بست ساتونکو لوبډله د سمیع الله شینواري په لوبډلمشری د سپین غر پړانګانو پر وړاندې نن سه شنبه د (زمري ۲۳مه) لوبېږي. سپین غر پړانګانو په دغه لیګ کې تېره ورځ خپله لومړنۍ لوبه وبایلله.
د لوبې پچه د رحمت شاه زرمتي په لوبډلمشرۍ د بست ساتونکو لوبډلې وګټله او د سپین غر بازانو لوبډلې ته یې د توپ وهنې بلنه ورکړه.
رحمت شاه تر پچې ګتلو وروسته وویل، وېشتنځای ته په کتو به هڅه وکړي چې سیاله لوبډله په ۱۳۰ منډو کې را وګرځوي.
په ننۍ سیالۍ کې د بست په لوبډله کې رحمت شاه زرمتی، محمد اکرم، نجیب الله ترهکی، دروېش رسولي، اعجاز احمدزی، ګلبدین نایب، نور احمد، نصیب خان، فرید ملک، بشیر احمد او محمد شهزاد اخیستل شوي.
همدارنګه د سپین غر پړانګانو له لوري په ننۍ سیالۍ کې سمیع الله شینواری، عمران میر، بهیر شاه، الله نور، اکرام علیخېل، طارق ستانکزی، ظهیر خان، حسن عیسی خېل، محمد ابراهیم، یامین احمدزی او عصمت الله لوبېږي.
تېره ورځ د دغه لیګ دوه سیالۍ ترسره شوې، چې په لومړۍ لوبه کې بند امیر ښامارانو لوبډلې، سپین غر پړانګانو او مس عینک، نهنګانو ته ماتې ورکړه.
